Г Мөнхтулга

« өмнөх12 дараах »

Шүлэг: Г.Мөнхтулга : ҮНЭН Л БАЙГААСАЙ
Оруулсан Bataka on 2026-10-14 16:15:26 (23 уншсан)

Миний гэх ертөнцөд ганцхан чи байдгийг

Мэдээсэй гэсэндээ сэтгэлээ цас болгон илгээлээ

Нэвсийтэл орсон хаврын цас үдийн наранд хайлах нь

Нэг л гунигтай бодол төрүүлнэ, чи минь анзаарахгүй бол би яах вэ

Атгахан зүрхнээсээ хязгааргүй ихээр хайрласан

Балчирхан чамайг би бүх шүлгэндээ шингээлээ

Амьдралын замд хараахан бидний мөр нийлээгүй нь

Ахиад л хүлээх тэсвэр нэхнэ, чи минь ирэхгүй бол би яах вэ

Зуу зуун мөчүүдэд чамаар өөрийгөө гоёсон

Зуны шөнө шиг тодхон үзэсгэлэнд чив чимээгүйхэн жаргалаа

Зүрхэнд минь амьдарч бодолд минь үргэлж эргэлдэх нь

Зөвхөн надад л илгээгдсэн гэлтэй, чи минь үргэчихлвэл би яах вэ

Миний хувьд чи үнэхээр онцгой нэгэн гэдгийг

Мэдрүүлэхийг хичээхдээ бусад ертөнцийг магад умартсан

Чиний хувьд харин би онцгой нэгэн болчихоод

Жирийн амьдралаа бахдаж сууна, чи минь гэхдээ мэдрэхгүй бол би яах вэ

Хайрлах гэж хичээхдээ дутуудсан бол би яах вэ, үгүй л байгаасай

Харин маргаашийн ирээдүй нийлчихсэн байх амьдрал минь үнэн л байгаасай…

21.04.26

Эх сурвалж : Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : АЙ МИНИЙ АМЬДРАЛАА…
Оруулсан Bataka on 2026-10-14 16:11:39 (16 уншсан)

Цаг хугацааны жимээр алхаад л алхаад л

Цаана нь өшөө харгуй замууд намайг хүлээгээд л

Ард минь харин цэцэгт хөндий халиураад л

Аяа миний амьдрал гурван цагийн уяанд өрнөөд л…

Гурван цагийн уяанд алдаатай оноотой хөврөөд л

Гучин найман насны даруухан ухаарал төрөөд л

Зуны халуун өдрүүдэд хүйтэн өвөл рүү тэмүүлээд л

Зуу хүрэхгүй жилийн эгэл амьдрал минь жирэлзээд л

Эгэлхэн хэрнээ нууцлаг ирээдүйг хааяа төсөөлөөд л

Эхний бөгөөд сүүлчийн гунигийн дуу сонсогдоод л

Амьдрал, мэдрэмж, тааламжууд зуу зуун хормоор амтагдаад л

Ахуйдаа уягдсан мэдрэхүйн эрх чөлөөндөө сагсуураад л

Эрх чөлөөт амьдралын баригдмал өдрүүдэд шунаглаад л

Эхийн сэтгэл, үйлийн үрийг үхэл амьдралтай тэнцүүлээд л

Ээдрээт зохиолын гунигт цуст төгсгөлд бачуураад л

Эрчит салхинд нүгэлээ гөвөх мэт үс, хүрэм минь хийсээд л алхаж явна даа.

Ай миний амьдрал аа…

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : АЛДМААРГҮЙ БАЙНА…
Оруулсан Bataka on 2026-10-14 16:10:36 (15 уншсан)

Алдмааргүй байна

Гэхдээ бас араас нь зуурмааргүй байна

Хэр өндөрт нисэхийг чинь харж

Хэнээс ч илүүгээр дотроо баярламаар байна

Гомдоогүй хэрнээ цааш нэг алхсан чамайг

Голын цаанаас ажиж, гүүрэн дээр хүлээмээр байна

Өнөөдөр юу хийж явааг чинь мэдэхгүй ч

Өчигдөр намайг ганц удаа ч болов бодсоныг чинь мэдэрч байна

Яг л над шиг…

Бодохгүй байгаа ч бодсоор л яваа чи

Яг л чам шиг…

Болно доо гэсэн итгэлээ алдалгүй нааш нэг алхсан би

Хэзээ нэг өдөр яг л өмнөх шигээ эргээд таарах

Хэт холын хэрнээ энүүхэн зүрхний эзэн чи минь

Хэт ойрын гэхэд ертөнц тэр чигтээ эргэлзэвч

Азаар…

Энэ бидэнд огт хамаагүй, бид бие биесээ хайрласаар л байна…

Алдмааргүй байна

Гэхдээ бас араас нь зуурмааргүй байна

Хэр өндөрт нисэхийг чинь харж

Хэнээс ч илүүгээр дотроо баярламаар байна

11.10.26

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ЭРЧҮҮДЭЭ БИЕ БИЕСЭЭ ХҮНДЭЛЖ ХАЙРЛА
Оруулсан Bataka on 2026-10-14 16:08:35 (18 уншсан)

Амьдралын амтанд агсарч яваа

Аргамаг хүлэг шиг залуусаа тогтож хайрла

Асахын хийморь нь дүрэлзэж яваа

Эрмэг баатрууд минь сонсож хайрла

Нас насны сүүдэрт бүдгэрч яваа буурлуудынхаа

Намбыг бодож хэсэгхэн амсхийж хайрла

Намтар түүхийн хуудсуудад бичигдсэн

Монгол эрс минь тогтож хайрла

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : Тун чиг яруухан ертөнцөд
Оруулсан Bataka on 2025-09-30 21:48:20 (4612 уншсан)

Нар эртлэн мандаж харанхуйг үлдэн хөөжээ

Намайг сэрээсэн гялбаа нь харин зуны дуулал байжээ

Энэ туяа нь тан дээр ч бас адилхан тусмагцаа

Ингэж яруусан гэрэлтэж нялхарсан ч байгаасай

Нар эртлэн мандахад шинэ өдөр мэндэлжээ

Налгар өдрүүдийн цуваа гинжин хэлтээтэй ажээ

Энэ өдөр эхлэхэд бялзуухай болжмор дэггүйтэж

Эргэлдэн нисч тоглох нь үүрдийн байсан ч болоосой

Голын ус хайр түгээх шиг давалгаалахад

Эргийн чулуу ариусах шиг норон үлдэнэ

Холын нэгэн зүрх туних шиг зүүдэнд саатахад

Хүний эгэл сэтгэл голын ус шиг хөвөлзөнхөн долгиолно

Тун чиг яруухан ертөнцөд бид төрөөд

Тунгалаг ус шиг сэтгэлээр амьдралд хөвөөд

Нар шиг, салхи шиг, байгаль шиг төгс атлаа

Намуухан сэтгэлийн нар үүлэн чөлөө шиг амьдралд мандана аа, аяа…

Салхи зугуухан салхилж алхаанд минь тааруулаад

Зөөлөнчиг үлээхэд хацар илбүүлнэ ээ, аяа…

Саадны сүүдэрт суугаад ажихад өвс намилзаад

Сэтгэлд даанчиг уянгалаг бодлууд хөвөлзөнө өө, аяа…

Тун чиг яруухан ертөнцөд бид мэндэлж

Тунгалаг ус шиг сэтгэлээр амьдралд хөвөөд

Нар шиг, салхи шиг, байгаль шиг төгс атлаа

Намуухан сэтгэлийн нар үүлэн чөлөө шиг амьдралд үүрд мандана аа, аяа…

21.09.2025 Г.Мөнхтулга- @tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : УДААНААР ХАЙРЛАЯ…
Оруулсан admin on 2024-10-29 12:20:29 (6727 уншсан)

Удаанаар би чамайгаа хайрлая

Яг л усны шувуу нуураа илэн эргэх шиг

Алсын бараанд дуран тавиад суух шиг

Амрагийн нүд харанхуйд асаж дүрэлзэх шиг

Удаанаар л би чамайгаа хайрлая

Зөөлнөөр би чамайгаа тэвэрье

Яг л бүх ертөнцийн хатуу уярч дэвтэх шиг

Бүүвэйн дуу аялахад хаа нэгтээ хүүхэд үнэгчлэх шиг

Бүжигчний хөл театрийн тайзыг шүргэн нисэх шиг

Зөөлнөөр л би чамайгаа тэвэрье

Бүлээнээр би чамайгаа үнсье

Яг л цас хайлтал нар төөнөх шиг

Цантсан сормуус чинь дотор ороод хатах шиг

Галын бурхан тэнгэрийн хүүг лусын дагинатай учруулах шиг

Бүлээнээр л би чамайгаа үнсье

Удаанаар бие биесээ хайрлая

Яг л цайрах үүлсийн дундаас ганц нэг бороон дусал унах шиг

Цагийн зүү яарч байхад зогссон мэт мөлхөх шиг

Цаана нь дахиад өчнөөн цаг огт яараагүй юм шиг

Удаанаар л хоёулаа бие биесээ хайрлая

Удаанаар би чамайгаа хайрлаж

Учралын эгшин догдлолын баяраа хүлцэе

Уяралын харцтай ховорхон хайрын үгсээ

Удаанаар хэлье, би чамдаа л хайртай

25/10/24 tulga.poetry ????????️

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ТАНД
Оруулсан admin on 2024-10-29 12:18:56 (6118 уншсан)

Гэнэт мэдэрсэн олон мэдрэмжээ ойлгож чадалгүй үүр цайлгаж

Гэрийн минь гадаа ирээсэй гэсэн нууцхан хүсэлдээ хайр шигтгэж

Гэнэн насаа таны л дэргэд өнөд барахыг хүсэж

Гэргий чинь болохоо асуухаас тань өмнө зүрхэн голдоо зөвшөөрч

Уйтгар үргээх яриа чинь бараг үлгэр шиг л санагдаж

Урт шөнийн зурвас надад чихэр шиг л амтагдаж

Мянга мянган сарнай шиг үгэн цэцэг дэвсүүлж

Маргаашийн ирээдүйг зөгнөж хосын учиг тантай эхлүүллээ

Гэнэт мэдэрсэн олон мэдрэмжээ цэгцэлж амжилгүй танд уярч

Гэрийнхнээс нуугдаж шөнө дөлөөр тантай ярихыг хүсч

Өөрөө ч мэдэлгүй хайрын шүлгэнд өмнөхөөсөө илүү дурлаж

Өчигдөр ярьсан болохоор л өнөөдөр жаргалтай сэрж

Амсаж байгаагүй олон амтаар та намайг дайлж

Мэдэрч байгаагүй нандин мэдрэмжийг анхны удаа амсаж

Зүүдэлж ч үзээгүй амгалан байдлыг таны дэргэд мэдэрч

Зүрхний витамин шиг хайранд чинь зүтгэн зүтгэн би даслаа.

Хайрыг ийм гоё өнгөтэй гэж эрт хэлэхгүй яасан юм бэ

Энэ дэлхийд солонгыг л хамгийн гоё өнгөтэй гэж бодож байлаа

Хайрыг ийм гэгээлэг гэж эрт мэдрүүлэхгүй яасан юм бэ

Энэ дэлхийг зөвхөн нар л гэрэлтүүлдэг гэж итгэж байлаа

Хайрыг ийм хүчтэй гэж эрт сануулахгүй яасан юм бэ

Ээж ааваас минь өөр чухал хүн үгүй гэж бодож байлаа

Хайрыг ийм гашуун гэж эрт анхааруулахгүй яасан юм бэ

Эргээд эвлэдэггүй хагарсан аягыг л хайран гэж харуусдаг байлаа

Ийм амттай зүйлийг л

Хайр гэдэг байхнээ

Ийм агуу хайр л

Шүлэг болдог байхнээ…

05/10/24 tulga.poetry ????????️

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : МИНИЙ…
Оруулсан admin on 2024-10-29 12:17:41 (5913 уншсан)

Хайрт минь дээ

Хонгор минь

Янаг минь

Ялдам минь

Минь гэж өмчилхөд

Минийх байгаасай гэсэн хүсэл минь

Мэлмэрсэн үгс минь

Шимширсэн зүрх минь

Мэлтэлзсэн сэтгэл минь

Сахиусан тэнгэр минь

Минь гэж өмчилхөд

Минийх байгаасай гэсэн сэтгэл минь

Миний ертөнцөд ирсэн

Гүнж минь

Миний бүхнийг эзэгнэсэн

Бяцхан минь

Минь гэж өмчилхөд

Минийх байгаасай гэсэн хайрт минь

Эрх минь дээ

Энхрий минь

Эрх янаг чи минь

Эгэл даруу нандин минь

Минь гэж өмчилхөд

Минийх болсон амраг минь

Мэгшсэн хоргодол минь

Огшсон хүсэл минь

Мэдэлгүй учирсан жаргал минь

Хэлэлгүй эзэмдсэн бүсгүй минь

Минь гэж өмчилхөд

Минийх болсон дурлал минь

Өөрийнхөө ертөнцөд аваачсан

Эгдүү минь

Өмөрч надад эрхэлсэн

Эмэгтэй минь

Минь гэж өмчилхөд

Минийх болсон бяцхан минь

Эрххэн минь

Энрхий минь

Минь гэж өмчилхөд

Минийх л байгаасай бурхан минь

02.04.2024 @tulga.poetry ????????️

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ДУРЛАЛ
Оруулсан admin on 2024-07-01 10:14:53 (6019 уншсан)

Авч үзээгүй мэдрэмжүүд ар араасаа цуврах чинь юу вэ

Амьтай голтой байдаг сэтгэл дүрэлзэх нь юуных вэ

Тэртээ өдрүүдэд үлдсэн анхны хайрын догдлол шиг

Тэр бүсгүй намайг учиргүй татах нь юуных вэ

Гомдол, баяр хоёр ойрхон болох чинь юу вэ

Голын чулуу идэгдэх шиг эмзэг байх нь юуных вэ

Алс хэтийн цаг хугацааг түүний хажууд төсөөлөөд

Арай л эрт өөрийгөө хөгшрүүлэх хүсэл юуных вэ

Гэнэтхэн асгарах энэ их сэтгэл чинь юу вэ

Гэнэдэж алдсан дурлалын жолоогоо яаж татах вэ

Холын холоос тэмүүлэх их хүслээ цүнхлээд

Ховсдох мэт татсан түүнруу яарах чинь юуных вэ

Бичиж амжаагүй шүлгийн ганган мөрт минь

Хайрлаж үзээгүй хүний бүсгүй үр минь

Зөрж төөрөлгүй учирсан хонгорхон минь

Зөвхөн өнөөдөр л үлдсэн юм шиг үхтлээ санах дурлал минь

Дурлал минь гэхэд дутуу мэдрэмж төрөх чинь юу вэ

Дуусдаггүй үлгэрт хамтдаа мөнхөрмөөр гэгэлхэн минь ээ.

17/02/24 tulga.poetry Г.Мөнхтулга Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : “293”
Оруулсан admin on 2024-07-01 10:12:56 (5401 уншсан)

Чиний үнэр миний хүсэл хоёр тулгарсан тэр үдэш

Чихний омог, гүрийн судсыг чинь уруулаараа би тэмтэрсэн

Чийгтэй хөнжил сөхөж амьсгаа авах шиг өндийсөн

Чиний бие миний дээр сандайлж суугаад бүжиглэсэн

Миний гар чиний биеийг бүтэн гурав гороолоход

Минчийсэн улаан царай юунд ч юм яаран довтолсон

Биеийн чинь нууцыг эзлэхээр нар зөв чамайг эргүүлэхэд

Бичмэл үсэг шиг чамин хөдөлгөөн тэрхэн зуур л таталгасан

Чиний харц миний доор тачаангуй агаад хүлцэнгүй

Чихэр шиг уруул чинь озоход янаг болоод саламгүй

Гарыг чинь салаавчилж толгой дээр чинь дарах гэхдээ

Гарцаагүй тачаалдаа мансуурч ялимгүй чангаар атгасан

Хээрийн шувуу шиг эрх дураараа тэр үдэш

Хэрхэн эхэлж бас хэзээ дууссанаа одоо ч гэсэн санадаггүй

Хэсэгхэн зуурын мансууралд тийм л хүчтэй автаад

Хээрийн шувуу нисэхээ мартаад тэнгэртээ зүгээр л хөвж одсон

Асар их хүслүүд тийм хурдан бас удаанаар эвцэхэд

Ар дэнжийн цэцгүүд дэлбээ дутуу хоцорсон

Амраглах онгод буцалж дурлалын оргилд хүрэхэд

Амьсгаа түргэсч, зүрх зогсох шиг жаргалын бал цацарсан

Хүсэн хүсэн учирсан бидэн хоёрын

Хүүхэн хараа хүртэл бие биедээ л шингэсэн

Хүлээс цангаа тайлсан эр эмийн

Хүнлэг зан, төлөв төрх хаашаа ч юм сарнисан.

2024.06.06 @Tulga.poetry Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : . ӨӨДГҮЙ АМЬТАН
Оруулсан admin on 2024-07-01 10:11:54 (5435 уншсан)

Үхлээс айдаггүй хэрнээ

Өөрт чинь хаягдахаас тэгтлээ айдаг

Өөдгүй зүрх

Хайрлуулахаас буцаагүй хэрнээ

Хүндлэхээс дандаа хулчийдаг

Өөдгүй сэтгэл

Үнэнээс холдоогүй байхад

Худалд дийлдчихээд байдаг

Өөдгүй амьдрал

Өнөөдөр дуусаагүй байхад

Маргаашийн явдалд түүртэж явдаг

Өөдгүй хүмүүн

Олон учрал таарахад

Орь ганцыг л мартаж чаддагүй

Өөдгүй эр

Орчлон ижил байхад

Очоод уулзчихаж болдоггүй

Өөдгүй тавилан

Онож ганц л төрчихөөд

Олигтой нэг ч шүлэггүй

Өөдгүй найрагч

Одоогоо мэдрэх байтал

Өнгөрсөндөө бэдэрч үлддэг

Өөдгүй заяа

Би өөдгүй ертөнцөд ирсэн

Өөдгүй хүн

Өгөрсөн тархи, цөхөрсөн зүрхтэн

Өрөвдөхөд өр хэмхчих

Өширхөж үйлийн үр сануулах

Өөдгүй амьтан…

Г.Мөнхтулга Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ХАЙР УДАХГҮЙ ИРНЭ
Оруулсан admin on 2024-07-01 10:10:39 (5564 уншсан)

Чи ийм гоёхон цэцэг болоод

Чамд ийм халуухан сэтгэл байгаад

Яг л чамд таарсан чиний сөүлмэйт

Нэг л өдөр чиний төөрөг замд урин таараад,

хайр ирнэ ээ

Тун удахгүй чамд дурлал ирээд

Түүнийгээ чи бүхий л хайраараа бүтэн хайрлаад

Цэцгийн тоос арчих шиг тийн нандигнаж

Цээж бүлээн сэтгэлийн голоос бүрэн халамжлаад,

хайр ирнэ ээ

Тун удахгүй чамд хайр ирээд

Түүнийгээ чи эцгийн гэрийн хоймор дахь шүтээн адил

хүндлээд

Багана алдалдаггүй ёс шиг тийн дээдлээд

Багын охин унаган зангаар нялхамсаж эрхлээд,

хайр ирнэ ээ

Тун удахгүй чамтай мөрөөдлийн хүн чинь таараад

Түүнийгээ чи зүүдний үргэлжлэл шиг санан сэрж ядаад

Эцсийн удаа мэт өдөр бүр тийн санаад

Энэ биеэ зориулавч цаана нь өртэй үлдэх шиг бодогдоод,

хайр ирнэ ээ

Тийм л агуу зүйлийн эхлэл урин дуудаад

Тэр л өдрийн учрал энэ зун чамд таараад

Тэсэлгүй уулга алдах шиг тийн итгэж ядаад

Тэгээд зүгээр л үлдсэн амьдралаа түүнд зориулаад,

хайр ирнэ ээ

Чи ийм гоёхон цэцэг болоод

Чамд ийм халуухан сэтгэл байгаад

Яг л чамд таарсан чиний сөүлмэйт

Нэг л өдөр чиний төөрөг замд урин таараад,

хайр ирнэ ээ

Г.Мөнхтулга Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ХАЙР
Оруулсан admin on 2024-01-25 17:33:21 (6363 уншсан)

Хайр гэдэг ямар гоё үнэртэй юм бэ

Яг л сүрчиг шиг

Халамж үнэртээд түүнгүй бол амьсгалж чадахгүйнэ

Хайр гэдэг ямар гоё амттай юм бэ

Яг л чихэр шиг

Хүсэл чангаагаад амсахгүй л бол унтаж чадахгүйнэ

Хайр гэдэг ямар гоё өнгөтэй юм бэ

Яг л солонго шиг

Хараа булаам гоо төрх нь харанхуйд ч тодрох юм

Хайр гэдэг ямар тансаг галбиртай юм бэ

Яг л бүсгүй хүн шиг

Хонгор ялдам төрхийг нь өөрөөсөө ч харамлах юм

Хайр гэдэг ямар сайхан эгшиглэн юм бэ

Яг л жаргалын анир шиг

Хамгийн нандин үгс, энхрий аялгуугаар ертөнцийг дүүргэх юм

Хайр гэдэг ямар эгэлгүй нууцлаг мэдрэмж юм бэ

Яг л далдын хүч шиг

Хүсэл, биеийг минь эзэмдчихээд минийх гэх шиг удирдах юм

Хайр гэдэг хэзээ ирээд, хэзээ буцдаг зочин юм бэ

Харахаас эхлээд хүрэх хүртэл ямар их хүсэн догдлуулна вэ

Хайр гэдэг хэзээ төөнөж, хэзээ жиндүүлдэг улирал юм бэ

Халуун зунаар даарч, хүйтэн өвөл халууцаад яасан жигтэй оршино вэ

Үгс дутаж, үйлдэл багаддаг үхэл шиг энэ мэдрэмжийг

Өөр гарагийн хүмүүс мэдэрч чаддаг боловуу

Өрцний гүн дэх сэтгэл гэгч биегүй энэ эрхтэнг

Өнөөх гайхалтай мэдрэмж

дараа төрөлд нь дахин олдог боловуу

Хайр гэдэг ямар агуу юм бэ

Яг л шинээр амьдрах шиг…

07.12.2023 Tulga.poetry Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ТҮҮНД
Оруулсан admin on 2024-01-25 17:32:20 (6010 уншсан)

Би удахгүй явчих болохоор

Битгий надад дурлаарай гэв үү

Бишгүйдээ бид дотноссон байхад

Битгий улам дасаарай гэв үү

Чи удахгүй уйдчих болохоор

Намайг битгий хайрлаарай гэв үү

Чихэр шиг хайранд нь донтчихоод байхад

Намайг битгий өвтгөөрэй гэв үү

Яалаа гэж хүсэхэв дээ салах тухай

Ялгаагүй би ч дурлачихаад байна

Явмаар байвал чи л яв

Ялалтыг чинь зөвшөөрч нулимсаараа шагная

Явах замд чинь харин хөндөлсөж

Үлдээч гэж гуйлгүйгээр

Янаг үгс, халуухан тэврэлт

Үнсэлтээр ч гэсэн аргацаахгүй байя

Явмаар байвал чи л яв

Яг эндээ би үлдмээр байна

Яагаад чамайг мартана гэж

Ялгаагүй би ч дурлачихаад байна!

27.12.23 tulga.poetry Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ХОТЫН ШӨНӨ
Оруулсан admin on 2023-12-21 14:29:35 (6390 уншсан)

Зураачийн харц, бийрний үзүүр хоёрт

Зураг бүхэлдээ найр дэвсэж үзэгдэнэ

Бодол, мэдрэмж хоёрын огтлолцолд

Буйдхан энэ л гудамж яруусч өнгө нь тодосно

Бүтээлчийн догдлол нуугдсан торгон мөчид

Зургандаа сүүлчийн цэгийг яаруухан хатгана

Зун байсан газарт намар гэнэт ирэх шиг

Зуурдхан ирээд буцсан дурлал зүрхийг гижигдэнэ

Хотын бүрэнхий шөнөөр

Холхиж алхсан хүмүүс зөрнө

Холын бүдэгхэн хүсэл

Хойтон биелэх юм шиг бодогдоно

Хойтон биелэх тэр хүсэл

Зураачийн бүтээл хоёр

Хонгорхон нэгэн бүсгүйг

Цээжинд минь татлан зураглана

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ЧАМД
Оруулсан admin on 2023-12-21 14:27:26 (6285 уншсан)

Нуурын мандалд хунгийн далавч шүргэнэ

Нуугдсан сэтгэл чиний чиглэлд урсана

Нугын бэлчирт сараана цэцэг соёолно

Нуман зүрх минь чиний л зүгт цохилно

Ирж яваа зуны халуун наран бүгчимдүүлнэ

Ирж яваа чиний бүлээн зүрх бачимдуулна

Инээх чинь, ярих чинь, дуулах чинь улам намайг дурлуулна

Эрхлэх чинь, туних чинь, гомдох чинь улам хайлуулна хонгорхон минь ээ…

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : Зүүд
Оруулсан admin on 2023-12-05 10:34:21 (7147 уншсан)

Үнэнээ л хэлье…

Уржигдар чамайг зүүдэлсэн

Урд шөнө яасан гэж үү

Урд шөнө өөрийгөө зүүдэлсэн

Урд шөнийн тэр зүүд

Дахиад л сайхан байсан

Учир нь юу вэ гэж үү

Уруулыг минь чи үнсэж байсан.

Зүүд гэдгийг мэдэж байсан ч

Зүүдлээд л байх нь сайхан байсан

Зүггүй чи надаар тоглоод

Зүүдний төгөлд хөөцөлдөж байсан

Намайг чамд хүрэхэд

Инээсэн царай чинь

Ичингүйрэл болон хувирсан

Ичингүйрсэн хэвээрээ, нүдээ чи тас аньчихсан.

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ХЭДЭН ҮГ
Оруулсан admin on 2023-12-05 10:33:25 (6421 уншсан)

Хугархай хөлтэй ширээн дээр

Ганхаж буй ваартай цэцэг

Хугарсан хөл нь хүн чанар

Ганхах цэцэг нь мөн чанар

Хүн чанаргүй хүмүүсийн дунд

Мөн чанарыг бодох хэцүү

Мөнгө олж, ажил хийлгүй

Хүний дайтай явах хэцүү

Нийтээрээ эсэн мэнд юм шиг

Нийтээрээ эрүүл бус

Нийгмээрээ цатгалан юм шиг

Нийгмээрээ ядуу дорой

Мэдлэгтэй мэт хашгирсан

Мэдлэггүй хүний сүгнүүд

Мэдлэггүй мэт үзэгдсэн

Мэдлэгтэй хүний адагууд

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : ДҮРСГҮЙ БОДОЛ
Оруулсан admin on 2023-12-05 10:32:11 (6226 уншсан)

Чамаас ирсэн чат бүрийг

Дахин дахин унших юмсан

Тэгээд, үг бүрт нь

Тохирсон эможи дарах юмсан

Хамгийн нандин үгэнд чинь

Хаха дарах юмсан

Тэгээд, гомдоочихоод сандарч

Араас нь уучлал гуйх юмсан

Тэр гомдол чинь чамайг

Улам эгдүүтэй болгоосой

Тэгвэл би уучлал гуйгаад

Мянган үг бичих юмсан

Холын холоос зориод

Чамтай уулзах юмсан

Тэгээд, хөлөн дээр чинь

Толгой тавиад хэвтэх юмсан

Хамгийн хутга асуултанд чинь

Хариулж чадалгүй унах юмсан

Тэгээд, ичсэндээ улайгаад

Нүдээ тас аньчих юмсан

Тэр асуулт чинь намайг хөтлөөд

Унтлагын өрөөнд хүргээсэй

Тэгвэл би чамайг хөтлөөд

Гэрлийн унтраалга дарах юмсан

Tulga.poetry

( Дэлгэрэнгүй... | 0 | Шүлэг | Мөнхтулга Г | )

Шүлэг: Г.Мөнхтулга : БҮСГҮЙ ЧИ НАМАЙГ ХҮЛЭЭДЭГ ҮҮ
Оруулсан admin on 2023-12-05 10:30:31 (6083 уншсан)