Biirbeh.MN by Bataka

Э.Үржинханд : “Хайр цацруулж...” шинэ ном

Э.Үржинханд — Thu, 16 Feb 12 18:12:40 +0800

Залуу уран бүтээлч Энхбаатарын Үржинханд нь Улаанбаатар хотод төрсөн. 2009 онд “Өөртөө үнэнч үлдэнэ” нэртэй анхны шүлгийн түүвэр номоо хэвлүүлж олны хүртээл болгожээ. Богино өгүүллэгийн “Утгын чимэг” наадамд “Атаархал” өгүүллэгээрээ амжилттай оролцож, өдөр тутмын болон бусад олон сонин сэтгүүлд бүтээлүүд нь нийтлэгдсээр байна. 2010 онд богино өгүүллэгүүдээсээ түүвэрлэж эмхэтгэсэн “Шувуутай цүнх” нэртэй номоо хэвлүүлсэн. Энэ удаад уншигч та бүхэндээ “Хайр цацруулж...” нэртэй яруу найргийн шинэ түүвэр номоо дэлгэж байна.

Эрхэм уншигчид та бүхэндээ энэ оны анхны бүтээл "Хайр цацруулж..." нэртэй шинэхэн түүвэр номоо хайрын гэгээн Валентины баяр, мөн Монголчууд бидний баяр сар шинээ угтан дэлгэж буйдаа туйлын ихээр бэлэгшээж байна. Сэтгэлдээ гэрэл, зүрхэндээ хайраар дүүрэн уншигчид минь бие биедээ ХАЙР бэлэглэж, аз жаргал, халуун дулаан инээмсэглэлээр цалгин байхыг ерөөж шинэхэн бүтээлээ өргөн барья. Зохиогч

Хайр цацруулж...

Надаас холдож буй тэр олон өдрүүдийг одоо
Нарны тогоруудтай үдээд уртаар шүүрс алдана
Намиран намилзах шаргалхан мөчрүүдтэй хамт
Надад тайтгарал авчирдаг аядуухан дуу аялна

Б.Ундраа : Нойр хулжихад

Бусад — Wed, 15 Feb 12 14:22:27 +0800

Сэрүү унаагүй ботгоны буйлаан доор
Сэтглийг минь татсан үзэсгэлэнт талын доор
Хөдөөгийн нэгэн бор гэрт хүүхдийн дуу уянгална;
Хөөрхий нэгэн бүсгүй нулимсан доор амаржина
үрээн харсан эх жаргалын далайд умбана
Үнсэж тэрнийгээ таалаад сүүлчийн амьсгал хураалаа
Галзуурлаа дурласан дурлалын улзварын үр
Ганцаараа үлдсэнгээ мэдрэх шиг бүтэн шөнө уйллаа
Өнчирч хоцорсон ботгыг өрөвдсөн олон ч уйллаа
Өнөө маргаашаа бодон зовлонгын далайд умблаа
Үрээ үлдээгээд явсан эхийн сүнс амарсангүй
Үнэгчлэн унтахыг нь хүлээсээр диваажингийн зүг явсангүй
Эцэггүй өсгөхдөө айсан ч үрээн бодсоор амьдарч явсан эхийг
Ээрэм талын дундах салхи яахан ч мэдлээ
Ботгоны буйлан хүүхдийн дуутай эгшиглэж
Борхон талын шуурга хэсэгтээ л амсхийлээ
Есөн сарын өмнөх дурсамжын захидалууд хийснэ
Ерөөж ирээгүй тавиланг хэн нэгэн аван уншлаа
Сайн байна уу хайрт минь намайгаа санан сууна уу
Сар жилийн уртыг туулсан юм шиг санагдаж байна
Сэтгэлийнхээ гүнийг уудлан энэхүү зурвасаа
Салаад явсан чиний хаягийг мэдэхгүй ч бичин сууна

Б.Ундраа : Монгол минь Монголоороо байг

Бусад — Wed, 15 Feb 12 12:18:26 +0800

Цацал шингээсэн уулсынхаа, ар өврийг дагаж
Цагаан мөөг мэт гэрүүд, хаяа дэрлэн айлссан
Бут харгана бараадаж тэмээн сүргээ ачааллаж
Буурь сэлгэж, дөрвөн улиралтайгаа цуг нүүсэн
Заяа буянаа тэгшитгэн, мал сүргээ адгуулж
Зуу зуун жилийн түүхэнд ч Монгол төрхөө хадгалсан
Буурлынхаа хөлсөөр тамгалсан, газар шороондоо төрж
Буцаад хөрсөндөө шингэсэн ч сэтгэл амар явсан
Намар хаврын цагаар, шувууд нь зэллэх тэнгэртэй
Навч цэцэгсийн гуниглал, уйлж тайтгарах газартай
Дэлэндэж байдаг малтайгаа хүртэл ойрхон байдагтаа
Дэлхийн түүхэнд Монгол минь, тэнгэрийн заяат нутгаа
Эзэн Чингисийн тугандаа, Монголын минь сүр сүлд бадарч
Эр хоёр загалын удам, адуун дундаа дэргэж
Тулж өндийсөн баганат гэрийнхээ хойморт
Туг хялгасаар амьлуулсан, морин хуур нь хөглөөстэй
Уяхан Замбуутивийн нарыг, уяан дээрээ хотлуулж
Уртын дуутайгаа цуг, дуу хүртэл жаргалтай
Уул уулсыг аргадах ээжийн минь цацал шиг
Удмаас заяасан нүнжиг ёс заягаа гээдэггүй
Хонин өлгийтэй үрсийн минь инээмсэглэл шиг
Хотол олон Монгол минь, Монголоороо байг ээ

У.Мөнхбаатар : Чамайг санахдаа

Бусад — Tue, 14 Feb 12 23:06:09 +0800

Чамайг санахдаа би хаяа уйлдаг

Чи миний хажууд байгаасай гэж дуулдаг

Шөнө болгон зүүдэнд минь чи ирэхдээ

Шөнөжин санан зүүдэлж би сэрэхдээ

Өглөө болгон дэр минь нойтон нулимстай

Өдөржин бас үгүйлнэ нүд мөн нулимстай

Ингэж их санаж байхад чи хүрээд ирсэнгүй

Итгүүлтлээ бурханаас гуйсан ч бурхан нойрноос сэрсэнгүй

Өөр нэгнийг хайрлаад явна гэдэг надад бол хэцүү байна

Өөр шиг минь зовж байгаа нэгэнтэй шаналал минь тэнцүү байна

Би чамаас гуйсан уйлсан дуулсан санасан бодсон

Бие сэтгэл минь чамайг хайрласан хайсан гэвч чи яасан

Надаас чи холын хол одон нүүхдээ

Би чамдаа сайхан үгийг зүрхнээсээ олж түүхдээ

Нартад ганц заяасан амин хүүхдээ

Надаас аваад явсан ч сайхан байсан түүхтэй

Ойлгохгүй нь

Бусад — Tue, 14 Feb 12 07:53:19 +0800

Харж харж тогтсон

Харцаа би ойлгохүгүй нь

Сайхан та минь гэж

Санаа алдан гунихаа ч ойлгохгүй нь

Зөрөг зам дээр эзэнгүй

Зөрүүдлэн тэнүүчлэх харцаа ч ойлгохгүй нь

Зүрх ухамсарын тэмцлийн

Зөв бурууг бүр ч ойлгохүгүй нь

Зүгээр нь хөөрч, төөрч явна уу даа

Э.Үржинханд : Дурлалт хосуудад зориулав

Э.Үржинханд — Tue, 14 Feb 12 16:12:19 +0800

Навчсаа гөвөх моддын тасархай хаа сайгүй хөглөрсөн
Намрын тийм л шаргалхан өнгөнд сэтгэл алдарчихаад
Насан туршдаа холдомгүй хайртынхаа л дэргэд байвал
Нарт ертөнц бүхлээрээ жаргалд умбах шиг гайхалтай

Мандах наран зулай илбэх шиг тийм дулаахан илчтэй
Манхайх саран үүлэнд нуугдлаа ч гунихын аргагүй гэгээхэн
Мөнх тэнгэрийн доор хайрын сувд хэлхэх дурлалт хосууд бүхэнд
Мянган жил улирсан ч магад шив шинээр гэрэлтэх гэгээн ерөөл өргөе

Э.Үржинханд

А.Батбаяр : Эзэнгүй тасалбар

Бусад — Tue, 14 Feb 12 13:59:33 +0800

Энхрийлж явдаг юм аа түүнийгээ би сэтгэлдээ
Эзэмдэх хүсэл харин байхгүй ээ надад
Эгээтэй л хайртай гээд хэлчихсэнгүй чамд
Эв нь таарвал хэлэх л байсан
Эзэнгүй тасалбарыг чамдаа зориулж авсанаа
Ээ амжихгүй нь ээ гэхэд чинь мэдсэн
Эгэл бус энэ өдрийг чамтай л хамт өнгөрөөх гэсэн
Эндүү бодлыг минь бурхан шүүжлэх байх
Эзэнгүй болсон хайрын тасалбараа жаргалтай хост бэлгэлчихлээ
Эзнээ олсон л бол болоо доо, энэ өдрийг жаргалтайд тооцоё.

Жиммигийн хайрын түүх

Бусад — Tue, 14 Feb 12 12:48:14 +0800

Сайн байцгаана уу намайг Жимми гэдэг. Би Улаанбаатар хотын хамгийн цэвэр агаартай бүс болох Зайсан толгойд 3 давхар хаусанд амьдардаг. Би ч их азтай охин шүү. Ийм баян цатгалан айлд тэр олон охидуудаас сонгогдоод өргүүлчихдэг. Одоо надад дутагдаж гачигдах нэг ч зүйл байхгүй. Хүссэн үедээ гадуур зугаалаад л дургүй үедээ гэртээ, ил галны дэргэд хэвтээд, хүссэн амттанаа авж идээд л ...

А.Мөнхбат : Хайранд минь соёолж ургасан цэцэг билээ л чи ...

Бусад — Fri, 10 Feb 12 23:20:38 +0800

Хайранд минь соёолж ургасан цэцэг билээ л чи
Хувирна чинээ санаагүй сэтгэл билээ л миний
Цэгцэрч нэгэнт дэлгэрсэн цэцгүүд билээ л бид
Сэвтэнэ чинээ зүүдлээгүй итгэл билээ л миний

... нуугаад уйлдаг нулимсыг чинь би үзээгүй, гэвч мэднэ
Нууцхан хайрладаг түүнийг чинь би хараагүй, гэвч танина
Нэгэнт шийдсэн харцнаас чинь дальдарч суугаад ч яах билээ
Намайг орхиод явна гэвэл чамайг би хорихгүй ээ

А.Мөнхбат : Тэмцэл

Бусад — Fri, 10 Feb 12 23:02:27 +0800

Цасны цагаан шивнээ чонын улиантай шадарлаж
Цавчим өндөр халилнаа цуурай үүсгэн хангирсахад
Өлчир хөх уулсын дээгүүр өдөөн цацлан нисэх
Өвгөн бүргэдийн нүднээс хорслын оч манасхийв

Өдөлж дэрвэх насандаа өгөр сааралд үнгүүлж
Өрөөл татанхай болсны өшрөл улам лавсав
Ой тойнд нь бэтгэрсэн зовлонгийн шалтгаанаа санахаар
Олон жил шаналсан зовлогын шарх нь ч сэдрэв

Сэг шиншлэн шогших өлөн боохойн чанх дээрээс
Нэвсгэр бараан сүүдэр эн давхцах агшинд
Хийсэн хэргийн хариугаа амсах цаг нэгэн болсныг
Хөх чонын совин, хэнээр ч хэлүүлэлтгүй мэдрэв

Даль нь татуу бүргэд довтлох цэгээ онилов
Дэл нь боссон чоно ч давуу талаа тооцов...

Хоёр дүрс нэг болов...

...хэлбэр үгүй цэг болов

Газар тэнгэрийн хоёр их хүчтэний гунигт тулааны талбараас
Гүм аниргүйг эвдэж
Гурван хар хэрээ гуааг, гуааг хашгичлаа

2008.11.17

А.Мөнхбат : Амьдарч болмоор...

Бусад — Fri, 10 Feb 12 22:48:17 +0800

Гудамжаар л нэг
Гунигласан, цухалдсан хүмүүс.
Гутал нь тоостой, зарим нь ханзархай

Хаа сайгүй
Халтар жаалууд, хачин дэгжин залуус.
Харцаараа халаас нэгжинэ

Ганган тансаг машинууд
Газар мундсан юм шиг
Ганцхан зам дээр гацаж түгжирнэ

Ишиг

Бусад — Fri, 10 Feb 12 14:33:30 +0800

Өнгө өнгийн алаг цэцэгс
Өнчин ишигний нүдэнд тусна
Олон цэцгэнд төөрсөн ишиг
Онгирон сагсуурч тоглон наадна

Томоогүй жаахан өнчин ишиг
Тоотогонож тоголсоор ядраад уналаа
Тоогдох амьтангүй хөөрхий ишиг
Томмолзсон нүдэндээ нулимстай хоцорлоо

Д.Анхбаяр : Ээж

Бусад — Thu, 09 Feb 12 13:59:35 +0800

Эжий гэх ариун алдартай хүмүүн бүхнийг
Энэ орчлонгийн хүн бүхний
Сэтгэл зүрх дотроо нандигнан
Сайхнаас сайхан дурсамж болгоны илэрхийлэл болж байдаг

Төрсөн эжийгээсээ өөр үнэт эрдэнэ
Төрсөн цагаасаа хойш би үзсэнгүй
Том оо эр болчихоод ганцхан эжии таньдаа
Томоогүй бяцхан жаал мөнхөд байна

Д.Анхбаяр

Р.Гэгээ : Миний хайр

Бусад — Wed, 08 Feb 12 19:39:12 +0800

Хамгийн эхэнд чамайг санахыг
Хамгийн сүүлд чамайг дурсахыг
Хамгаас илүү чамайг хүсэхийг
Хамгаас өмнө чам руу тэмүүлэхийг
Миний хайр гэнэ
Хархан нүднээс нулимс эс унагахыг
Халуун сэтгэлийг нь үргэлж тэтгэхийг
Хачин их өрөвдөөд сэтгэл өмрөхийг
Хагацлаа гэхэд үл тэвчихийг
Миний хайр гэнэ
Тэнгэрийн охин тэвэрт минь эрхлэхийг
Тэмдэглэж хэлэхийн аргагүй сэтгэл догдлохыг
Хачин жигтэйхэн дотно санагдахыг
Харахаараа баярлаж, ярихаараа хөөрөхийг
Миний хайр гэнэ
Унтаж байхад нь аньсган дээр үнсэхийг
Удалгүй санаад эрхгүй инээмсэглэхийг
Аниргүй ширтээд алгуурхан тэврэхийг
Алхаагаа түргэсгэж чам руу яарахыг
Миний хайр гэнэ

Р.Гэгээ /Р.Мөнхдаваа/

А.Мөнхбат: Танхил хонгор

Бусад — Wed, 08 Feb 12 12:46:44 +0800

Ергөж хатирахыг нь харах юм бол
Ерөө, Хараа халгих шиг
Явдал давхилыг нь ажих юм бол
Янзага дүүлэн дэгдэх шиг

Тавилан заяа нь тэнгэрийнх гэмээр
Танхил хонгор морь минь дээ

Үргэж бусгахыг нь жиших юм бол
Үнэгэн сүүл шарвах шиг
Ороолж зугтахыг нь үзэх юм бол
Оонын эвэр цахилах шиг

Тавилан заяа нь тэнгэрийнх гэмээр
Танхил хонгор морь минь дээ

Уран галбирыг нь шинжих юм бол
Уулын бугын төрхтэй гэнэм
Анирдаж дуугий нь сонсох юм бол
Аялгуут хуурын татлага гэнэм

Тавилан заяа нь тэнгэрийнх гэмээр
Танхил хонгор морь минь дээ

Б.Батзаяа : ...

Б.Батзаяа — Tue, 07 Feb 12 15:06:10 +0800

Хаа нэгтээ гээсэн турьхан хурууд минь надад итгээрэй
Харанхуй өрөөнд чи л гэрэл асаасныг
Харж болохоос харж болохгүй хүртэлх бүх зүйлсийн
Хаана нь ч юм бэ чи л байсныг
Миний хүрч чадаагүй гоод чи хүрч
Мэдрэмж сэрлийг атган над дээр ирдгийг чинь
Мэдсэн шүү, мэдсэн

Охидынх шиг нарийхан гоо хурууд минь надад итгээрэй
Охидын хүзүү, нуруу, бас, нар тэмтэрдгийг чинь
Олж болохоос олж болохгүй хүртэлх бүх зүйлсийн
Оройд нь чи л байсныг
Ойлгосон шүү, ойлгосон

Б.Батзаяагийн ном [шүлгийн түүвэр]

Б.Батзаяа : Одноод зориулсан шүлэг

Б.Батзаяа — Tue, 07 Feb 12 15:04:30 +0800

Инээмсэглэлийг чинь энэ хэвээр нь хадгалж
Илүү биш, дутуу биш
иймээр чинь л чамайг хайрлаад
Барьж чадахгүй ч
ядаж шүргэхсэн гэх хүслээ авч үлдээд
Байхаас чинь байхгүй хүртэлх чамайг
дөнгөж таньж мэдрэх
Хонгор минь ямар сайхан юм бэ!

Чиний өмнө хүлцэнгүй байж
өөрийгөө голох
Чиний уруул уруулд минь хүрэхэд
уруулаасаа ичих
Царайлаг бишийн доторх
гоо дүрд ховсдуулаад
Цаг хугацаанаас үл хамааран
чамд дурласаар л байх
Хонгор минь ямар сайхан юм бэ!

Нойтон бүхнийг чинь
хатсан өвс мэт
шуналтайгаар мэдрэх
Нов ногооноор чамайг
өөрийгөө шараар төсөөлөх, эвлэрэх
Айдас хийгээд цочим мэдээ
эцэст нь чимээгүй тайвшрал
Амьдрал дунд ямар азаар чамтай учрав аа
гэж бодох
Ай, ямар сайхан юм бэ!

Энэ бүх сайхныг
энэ хэвээр нь үлдээгээд
Эрвээхэй шиг нисч үзэх...
ингэж чамд ахин дахин дурлах
Холын холоос таталцах
ямар нэгэн халуун
Хонгор минь, хонгор минь энэ чинь
ямар сайхан юм бэ!

Б.Батзаяа : Арван нэгдүгээр сарын дуулал

Б.Батзаяа — Tue, 07 Feb 12 15:01:05 +0800

Сайн аав байх, охинтой болох
Сайхан бүсгүй болж хүү төрүүлэх
Өвснөөс моддын уй гуниг, тэвчээрийг олж сонсох
Өөрөөсөө далавчаа гээсэн шувууны тухай шүлэг унших
Би Guns N' Roses-ийн арван нэгдүгээр сарын бороо

Дагжин чичирч байснаа гэнэт халуурах шиг шүлэг бичих
Дараа нь гашуун эм уугаад эдгэх шиг эргэн хүн болох
Гоо бүсгүй шиг эмзэг нандин бүхнээ ганцхан эрд зориулж
Гоонь эрийн шуналаар өөрийгөө амтлан амтлан мэдрэх
Би Guns N' Roses-ийн арван нэгдүгээр сарын бороо

Хүүхэд байхдаа сонсоогүй шидэт үлгэрүүдээ аавдаа ярьж өгөх
Хүсэл, төсөөллийн ертөнцөд хүү нь гэрэлт цох гэж ээждээ итгүүлэх
Найдвар гээч сахиусаа нуруундаа үүрсэн бөгтөр даяанч
Намайг өвтгөх хүмүүсийн төлөө дотроосоо шүүрэх нулимс шиг тунгалаг
Би Guns N' Roses-ийн арван нэгдүгээр сарын бороо

http://3.bp.blogspot.com/-2gReKlELj6o/Tu7XQeUmF4I/AAAAAAAACEk/yAxe90sPKD0/s400/2011.12.05-252.jpg

images/content/2011_12_05-252.jpg

Б.Батзаяа : Мартах юм шүү

Б.Батзаяа — Tue, 07 Feb 12 14:59:53 +0800

Хувирч үл өөрчлөгдөх хундага минь
шилбэнээс чинь би бариад
Хувирч үл өөрчлөгдөх бүхнээ
тулган шимээд ганхан сууна
Уйтай ийм л тэнгэр, яг ийм л сар, ийм л шөнө
Унтаад сэрэхэд алга болчихсон байна гэж бодож ууна

Хаанаас ч юм бүү мэд,
магадгүй хэн нэгэн эрд
Хаядсан эмэгтэйгээс гээгдэж унаад
надад олдсон сэтгэл минь ээ
Өвтгөөд байгаа энэ гомдол, энэ ганцаардал, энэ бүхэн
Өглөө босоход эдгэчихсэн байна гэж итгээд уу!

Тэвчин хүлээгч
хувирч үл өөрчлөгдөх горьдлого минь дээ
Тэр энэ атирч хувирах утаа байжээ,
замхран арилах зүүд байж
Магадгүй энэ шөнө түүнийг анхных шигээр нь
ганцхан удаа зүүдлээд
Маргаашнаас ахиж бодохгүй юм шүү,
мартах юм шүү!

Б.Батзаяа : Юу мэдэрдэг гээч

Б.Батзаяа — Tue, 07 Feb 12 14:58:14 +0800

Зүүн далавчин дээрээ чиний хумсны сорвитой ч
Зүгээр дээ, би ниссээр л байна
Өд нь дэрэн дээр чинь унаж
Өвдөлт нь цээж рүү хатгасаар
Өөрчлөгдсөн юм алга даа, энэ хавьцаа
Өвдсөөр л байна...

Гэнэт хамаг бие хөлөрч гар чинь духанд хүрэхэд
Гэртээ сэрсэн мөртөө би хаана ч юм байдаг
Эсвэл чичирч даарсаар хүйтэн шилэнд хүрмэгц
Энд тэндээсээ хайлаад лаа шиг урсчихдаг
Ил харагдахгүй ямар нэг эрчим энэ өрөөнд
Эргэсээр л байна...

Хагархай шил тэмтрээд өндгөө исгэх төдийд
Хаа сайгүй ув улаан бөмбөлгүүд нисэлдээд л эхэлдэг
Зүрх шиг цохилох ийм олон бөмбөлөг дунд хэвтээд
Зүрхээ нэг нэгээрээ хэрхэн хагарахыг хараад
Хэзээ мөдхөн, ирэх юм шиг санагдах
чамайг хүлээн
Хэвтсээр л байна
Хэвтсээр л байна...

Б.Батзаяа :

Б.Батзаяа — Tue, 07 Feb 12 14:56:03 +0800

Өргөс шиг хүмүүсийн дунд
хөөс мэт амьдрах
Өөрөө нулимс болж унаад
хага үсрэх
Өвдөх
ганцаардах...
Уртхан амьсгаа авбал хөрчих гээд
өвлийн шөнө
Уйтгарлах
хэн нэгнийг хайх
тэнүүчлэх...
Ноход гүйж өнгөрөх
даарах
Нөхдөө үгүйлж
өнгөрснийг дурсах
гуних
Өвлийн тэнгэр
чимээ аниргүй дүнсийх
"Өнөөдөр ядаж цас орсон бол" гэж бодох...
Хөөс мэт нэгэн
өргөс шиг хүмүүс дунд
Хөнгөн чанараа гээн
живэн байна!

У.Мөнхбаатар : Эх орон

Бусад — Mon, 06 Feb 12 22:25:43 +0800

Миний эх орон мандах нарны туяатай
Миний чиний сэтгэл зүрхэнд үүрд мөнх уяатай
Халхын уудам талд төрсөндөө би азтай
Хаана ч байхгүй эх орон минь азийн цээжинд бий
Дээд тэнгэрээс ивээгдсэн монгол гэдэг нэртэй
Дэлхийд ганцхан байдаг цагаан бүслүүрт гэртэй
Мянганд нэг л тохиох Чингис хаан шиг эртэй
Мөнхөд бадарч байх тулгандаа бид галтай
Зориг нь цээжиндээ багтахгүй баатар эрс байдаг
Золтой ард түмнээс минь адис авахаас айдаг
Зовлон жаргалыг тэнцүүлдэг бидний эх нутаг
Зоримог сайхан нутгаар минь дэлхий нэг дутаг
Манж дайчин улс хүчтэй л гэнэ монгол шиг босоо байгаагүй
Москвагаас биднийг удирддаг л гэнэ бид хэзээ ч айгаагүй
Нүдэндээ галтай нүүрэндээ цогтой монгол эрсийг харах уу
Нартад ховорхон тохиох хаан угсааг чи дарах уу
Энэ бол монгол

А.Мөнхбат: Дөрвөн цаг

Бусад — Mon, 06 Feb 12 21:20:50 +0800

Сар мэлтрээд
Салхи өртөөлөөд
Цаг наашлаад
Цас ханзраад
Яргуй дэлгэрээд
Ямаа цадаад
Ногоо ургаад
Нуур долгислоод
Дэлхий дэлэгнээд
Дэлэнт ивлээд
Нар холдоод
Навчис шарлаад
Хяруу унаад
Хазаар хийсээд
Өвс цантаад
Өвөлжөө санагдаад
Жамаа дагаад
Жавар тачигнаад
Саран мэлтрээд
Салхин өртөөлөөд

2007.11.24

А.Мөнхбат: Архи

Шүлэг — Mon, 06 Feb 12 21:14:44 +0800

Болор жүнзний ёроолд чөтгөр үүрээ засаж
Боловсон согтуу түүнийг нь бодсон ч юмгүй хөнтөрч
Үүрээ эвдүүлсэн албин
Үсээ бостол уурсав
Хээгээ алдсан донтон
Хэргээ хүлээх үлдэв
Архичны гэдсэнд орсон өндөг
Авгалдай болон томров
Хүйс нь солигдсон хоёр
Хэн хэндээ дасав
Адаг сүүлд нь тэд
Амраг хосууд боллоо
Архичин чөтгөр хоёрын
Аваа өгөө тэнцлээ

2008.12.25

А.Мөнхбат: Өнгийн гэрэл урсаж ...

Бусад — Mon, 06 Feb 12 21:10:30 +0800

Өнгийн гэрэл урсаж
Өвлийн шөнийг чимлээ
Мөнгөн одод чуулж
Хөнгөн хөгжим эгшиглэлээ
Модод бүгдийг чимэх гэж
Одод хүртэл энд унав
Будрах цасны хаялага бүхэн
Будганд уусаж солонго болов
Цагийн зүү давхцаж
Цадигийн хуудас эргэв
Он цагийн солбицох цэгээс
Онгоц хөөрөн нисэхүй..., орчлон нэг л гунигтай

А.Мөнхбат: Танхил хонгор

Бусад — Mon, 06 Feb 12 20:10:17 +0800

Танхил хонгор
Ергөж хатирахыг нь харах юм бол
Ерөө, Хараа халгих шиг
Явдал давхилыг нь ажих юм бол
Янзага дүүлэн дэгдэх шиг
Тавилан заяа нь тэнгэрийнх гэмээр
Танхил хонгор морь минь дээ
Үргэж бусгахыг нь жиших юм бол
Үнэгэн сүүл шарвах шиг
Ороолж зугтахыг нь үзэх юм бол
Оонын эвэр цахилах шиг
Тавилан заяа нь тэнгэрийнх гэмээр
Танхил хонгор морь минь дээ
Уран галбирыг нь шинжих юм бол
Уулын бугын төрхтэй гэнэм
Анирдаж дуугий нь сонсох юм бол
Аялгуут хуурын татлага гэнэм
Тавилан заяа нь тэнгэрийнх гэмээр
Танхил хонгор морь минь дээ

2009.05.23

М.Цэемаа : Нэргүй шүлэг

Бусад — Mon, 06 Feb 12 15:59:06 +0800

Сансар тэнгэрийн оройд бурхад залардагаараа оршиж
Саруулхан уужим шөнөөр оддын орчилд маанийн бясалгал үйлдэнэ
Санаан зоргоор төрсөн өтөл энэхэн орчлонд
Сайхан явъяа гэтэл сэтгэл нэг л хүрэхгүй нь
Айлган хайлган хорвоон бурхадын мутарт үймэрч
Амь тэмцэлдэн гүйлдэх “амьдын там” юм уу
Алгаа тосон “гуйлга” гуйхуй дор зүрх шимширнэм
Аяа би орчлонд “өөрийнхөөрөө” дуусна
М.Цэемаа

М.Цэемаа : Нэргүй шүлэг

Бусад — Mon, 06 Feb 12 15:56:46 +0800

Ухаарахуй буюу эгээрхүй дор мөргөмүү би бээр
Уярал хийгээд найрал аялгуу эгшиглэхийн дор
Угтах болоод төгсөхийн зуур жаргал бодогдном
Ухаарахуй хийгээд мунхархуйн завсар зовлонт хүмүүн дуусна
Нар баруунаа нэгэнтээ хэвийн моддын навчис зугаатай сэрчигнэнэ
Навчсын шүлганалдан дуулалдах янагсын дуун газрын хэвэлд шингэнэ
Намжаа их орчлон намуухан хийгээд эгэл болоод хоосон
Нартын аугаа амьдрал хэвийн хийгээд уйтан
АЯА орчлон хоосон...
Хоосон бус уу
М.Цэемаа

Н.Базардэрэг : Хайку

Н.Базардэрэг — Mon, 06 Feb 12 13:42:54 +0800

Хүүгээ санасан эхийн
Хүсэл, хясал тэнцэнэ
Хайр буруугүй орчлон

Гал хайртай бүсгүй
Гомдохдоо нулимас унагана
Зүрх минь норно

Халуун янаг хонгор
Хардахдаа сэтгэлээ умартана
Хайрын утас тасарна

Хамт байх учиг
Холын од руу харвана
Хонины ээлжтэй амьдрал

Хонгор хайртай энхрий
Харамлахдаа өөрийгөө мартана
Хос наран мандана

Э.Агиймаа : Чимээгүйхэн

Бусад — Mon, 06 Feb 12 13:08:45 +0800

Нэг.
Шаргал навчис хийсэн чимээгүйхэн мод уйлах
Шаналлаар дүүрэх бодлууд салхинд хийсэн арилах
Шинэ хуучин хосолсон шигшмэл сонгодог ертөнцөд
Ший жүжгийн гол дүрүүд чимээгүйхэн хувиралдах
Хоёр.
Анхны цас ороход чимээгүйхэн газар уйлах
Аясын хөнгөн санаанууд аажуу тайван хөврөх
Аз азгүйдэл ээлжилсэн хачин жигтэй хорвоог
Аядуу зөөлөн болгох гэж чимээгүйхэн урагшлах
Гурав.
Голын ус урсаж чимээгүйхэн чулуу уйлах
Голт зүрх өөрийн эрхгүй алгуурхан уурсах
Гомдол баясал хоёрын зааг нь үгүй амьдарлын
Гольдрол замыг нь хайн байж чимээгүйхэн алхлах

Э.Агиймаа : Үнэний эрэлд

Бусад — Mon, 06 Feb 12 13:07:42 +0800

Гоо үзэмж голтой үнэнийг эрэх тусам цөөрөөд
Гэрэлтэй өдрөөр ч түнэр харанхуй мэт төөрнөм
Хүний орчлонгоос тэс өөр үнэн шударгын ертөнц
Худал үггүй ариухан орон зай миний тархинд суунаглан байнам

Гуниглая гэлээ ч гомдол минь дотогшоо чиглэн хязгааргүйн гүнд шигдэх мэт
Гудамжинд гарч үнэн чамайг хайх нь ёроолгүй далайд шумбах мэт
Баярлая гэлээ ч баясал минь гадагш нэвтрэхгүй араншин мэт
Байшин дотор өглөгч занг хайх нь зэлүүд хээр талд буудаллах мэт

Марзаганах хэдэн үгс бүхий ядмагхан шүлгийг минь уншихдаа
Магадгүй худал байна гэж элс шороотой ижилсүүлэн ч болох юм
Миний бодлыг тольдон, өт хорхойтой зүйрлэсэн ч болох юм
Миний амьдарлыг төсөөлөн, төөрсөн унагатай адилтган

Тохуурхан бодсон ч болох юм
Гагцхүү ганц үнэн миний бодолд соёолон байна
Газар дээр биш миний мөрөөдлийн ертөнцөд
Гарт минь бүлээцэгдэн, тархинд минь хадгалагдах
Гараг ертөнцийн үнэн гээчийг ганцаараа бус олуулаа мэдрэхсээн.

2011.02.03

Э.Агиймаа : Бурханы үг

Бусад — Mon, 06 Feb 12 13:06:17 +0800

Бурханы цус судсаар минь гүйхэд шүлгээ би бичдэг
Будант орчлонгийн нугачааг дэвтрийн цааснаа буулгадаг
Буруудаж зөвддөг орчлонгийн алтан учгийг ухаарах гэж
Буман бээрийн алсаас бурханд үгээр хүүрнэдэг

Тэнгэрийн дор газар оршиход үүлс хураа буулгадаг шиг
Тэнэгийн дор ухаантан оршиход сэтгэл нулимсаа хайрладаг
Тэргэл саран гэрлээ гийгүүлэхэд одод онцлон анивчдаг шиг
Тэртээ зэрэглээ шиг амьдарлаа би шүлгээрээ хэмжиж алхдаг

Цэцгийн үр хөрсөндөө соёолох мэт шүлгээ би уншдаг
Цэлмэг тэнгэрт шонхор дүүлэх мэт онгодоо бас хөглөдөг
Цээжин доторхи хоёрхон шүлгээрээ бүхий л ертөнцийг төсөөлчихөөд

Цэрвэх завгүй халуухан аашаараа шүлгээ би гоёдог
Бурханы дүр нүдэнд минь үзэгдэхэд шүлгээ би уншдаг
Буруу ч бай зөв ч бай дөрөвхөн мөртөө туурвидаг
Буцах тавилангүй орчлонгийн жамыг сөрж чадахгүй ч
Бусармаг бүгдийг илчилж шүлгээ би уншдаг

Зуурдын жаргал бүхнийг үүрдийнх болгон холбож
Зулзган модны навч шиг ухаанаа дэлгэрүүлж амьдардаг
Зурвасхан харваад өнгөрөх залуу насаараа чимсээр
Зургаахан мөртэй шүлгээрээ гунигаа аргадан тайтгардаг

Бурханы үг чихэнд минь сонсогдоход шүлгээрээ би бахархдаг
Бурхан шүлэгчийн агуу хишгээс өчүүхэн ч болов хүртчихээд
Буруудаж зөвддөг амьдралын алтан учгийг ухаарах гэж
Бурхдын шүлгийг би буурал хорвоод түгээхийн талаа амьдарнам

2009.12.13

Нарантуяагийн Базардэрэг

Зохиолчдын намтар — Mon, 06 Feb 12 12:43:42 +0800

Эрхэс овогт Нарантуяагийн Базардэрэг

1986 онд Архангай аймгийн Батцэнгэл суманд төрсөн. Үхэр жилтэй. Хуульч, өмгөөлөгч мэргэжилтэй. 2000 оноос уран бүтээлээ туурвиж эхэлсэн.

1.Бүтээл:

Ø 2004 онд “Чанадын сэтгэл” яруу найргийн түүвэр
Ø 2005 онд “Гэгээн зүг” яруу найргийн ном
Ø 2006 онд “Гүн огторгуй” яруу найргийн номоо хэвлүүлсэн

2.Амжилт

Ø “Болор Цом-2004” наадмын шагналт
Ø Төрийн соёрхолт яруу найрагч Н.Нямдоржийн нэрэмжит “Яруу найраг-Сэтгэлийн жигүүр” наадмын 2004 оны авяаслаг яруу найрагч Мөнгөн медаль, 2005 оны шилдэг яруу найрагч Алтан медаль, 2006 оны шилдэг яруу найрагч Алтан медаль
Ø Архангай аймгийн хүүхдийн “Хүрэл тулга” наадмын 2001, 2003 оны тусгай байрын шагналтай
Ø “Авилгагүй төр-Хөгжлийн түлхүүр” улсын уралдааны шүлгийн төрөлд тэргүүн байр
Ø “Хангайн Цом” “Гал Онгод” наадамуудад амжилттай оролцож байсан
Ø Их Засаг их сургуулийн Алдарын од, Их засаг алт, 10 жилийн ойн болон тэргүүний оюутан алтан медальтай
Ø Архангай аймгийн 2006 оны шилдэг оюутан

3.Ажилласан байдал

Ø 2007-2009 онд Их засаг их сургуульд багш
Ø 2010 оноос одоог хүртэл Монголын Өмгөөлөгчдийн холбооны гишүүн өмгөөлөгчөөр ажиллаж байна.

Харилцах утас: 88002776

Ээж

Далай ламын айлдвар — Mon, 06 Feb 12 12:42:46 +0800

Эжии гэх ариун алдартай хүмүүн бүхнийг
Энэ орчлонгийн хүн бүхний
Сэтгэл зүрх дотроо нандигнан
Сайхнаас сайхан дурсамж болгоны илэрхийлэл болж байдаг

Төрсөн эжийгээсээ өөр үнэт эрдэнэ
Төрсөн цагаасаа хойш би үзсэнгүй
Том оо эр болчихоод ганцхан эжии таньдаа
Томоогүй бяцхан жаал мөнхөд байна

Ц.Дамдинсүрэн : Хоёр цагаан юм

Цэндийн Дамдинсүрэн — Sun, 05 Feb 12 15:21:19 +0800

Зуны халуунд Говь-Алтайн сүрлэг хяраар цагаан цас бууралтаж бууралтаж байна. Ар талаар нь ургасан бага сага тахир яргайнаас өөр ой мод, өвс ургамал бараггүй баргар их хадан оргил тэнгэрийг хатган үргэлжлээд, завсраар нь хадан хавцал бүрэлзэж байна. Сэрвийсэн сэхийсэн өндөр оргилуудыг ажиглахад үр ач нартаа уурлаж загинах занчихыг завдаж байгаа зэвхий царайтай буурал өвгөн шиг харагдах тул аргагүй сүрдэж ямар ч хүний зүрх шимширч сэтгэл ширвээдэж, царай барайх юм.
Газрын сүрлэгээс гадна, замйн бэрх нь даан чхэцүү юм. Зам бэрх учраас нутгийн ардад тэрэг байдаггүй, юмаа малын нуруунд ачиж нүүдэг байна. Уулыг хөндлөн давахад бас гайгүй, харин уулын энгэрээр нь олон сархиаг хижиж явахад тун нэцүү байдаг. Тэр жил би Говь-Алтайн өврөөр олон сархиаг хижиж, өртөө улаа хэрэглэж, албан хэргээг нэг увж билээ. Цавчим хяр, гүн жалга ээлжилж гарын хуруу шиг буюу дээлийн хуниас шиг байх юм. Нэг хянгыг мацаж авирч арай гэж давахад цаана нь гүн хавцал харагдах юм. Нарийн харгуйгаар хадан дундуур ингэж өгсөх уруудах гэдэг мөн ч хэцүү байлаа.

Ц.Баттуяа : АМЬДРАЛД ИЙМ ИХ ХАЙРТАЙ БОЛЧИХ ГЭЖ?!!!

Ц.Баттуяа — Sun, 05 Feb 12 00:31:27 +0800

Нэрээрээ гарчиглаж бичсэн

Найраглалыг минь ухаантнууд

Хэтэрхий богинохон юм хэмээн шүүмжилцгээнэ

Цээж дүүрэн ус цэлэлзэвч

Ам хатаж, хоолой аргана

Уруулыг минь чийглэх

Ус олдохгүй тарчилгахад

Цэг тавиад хурдхан босох гэтэл

Цаас, үзэг хоёр янаглалдан тэврэлдээд

Хагацаж өгдөггүй

Цэг, тэгээд таслал тавина гэнэ

Амьдралд ийм их хайртай болчих гэж?!!!

Ц.Баттуяа 2012-01-12

Ц.Баттуяа : БАЯРТАЙ ГЭЖ ХЭЛЖ ЧАДАХГҮЙ НЬ

Ц.Баттуяа — Sun, 05 Feb 12 00:26:44 +0800

Хоёр жил уулзаагүй чамтайгаа бодлоороо үргэлж хамт байсан юмсан

Холдож одсноос хойш чи минь надаас бишүүрхэж амжжээ

Уруулын чинь бал яг хуучнаараа

Үнсэх чинь хүртэл дотнохон атлаа

Үг бүр чинь мөс шиг хүйтэн байна

Минутын өмнө хэлсэн “мартаагүй” гэсэн үгнээсээ

Маргаж буцаад сэтгэл чинь тэвдүү байна

“Санасан шүү” гэсэн үг бүрийнхээ араас

Санаа алдаад чи минь гунигтай байна

“Бүгдийг цэглэе” гэж ганцхан удаа ам алдсан ч

“Бүрмөсөн биш ээ” гэсэн шиг нүд чинь гэмшингүй байна

“Мартаарай” гэж зориглон дуугарахдаа ч

“Магадгүй битгий” гэсэн шиг харц чинь аргадангуй байна

“Сүүлчийн удаа” гээд тэврэхэд минь

Над руу тэмүүлэх гараа хүчлэн бариад

Бодол чинь хэтэрхий давчуу байна

“Яв даа” гэсэн үг хоолой дээр тээглэчихээд гарч өгөхгүй

Би чинь ч бас уймраа байна

“Баяртай” гэж чамдаа хэзээ ч хэлж чадахгүйгээ мэдрэх тусмаа

Сэтгэл минь хэтэрхий давчдаад байна

2011-07-22

М.Цэемаа : Нэргүй шүлэг

Бусад — Sat, 04 Feb 12 23:39:42 +0800

Дуунд халсан сөнчийн дугараа эрэмбээ мартахад
Дарсанд шандаагүй хундаганы тасралтгүй дуу шаргина
Дахин дахин жингэнэх шилний дуу шаргиж
Давтагдана үгүй боломжийг алдана үгүй шимтэнэ

Уруул хүрэх төдийд чимхээд авдаг дарс нь
Хуруу хүргэх төдийд хиртээд өнгөрдөг заяа юу
Уугаад өнгөрсөн хойно түлхээд хаядаг дарс
Хуурамч энэхэн орчлонгийн нүгэлт нүдний нулимс ч юм уу
М.Цэемаа

М.Цэемаа : Гуниглан

Бусад — Sat, 04 Feb 12 23:38:15 +0800

Сар цонхны шилэн дээр хальтчин энгэрт нулимстай шингэнэ
Сайвар тарлан гэрэл нь аниргүйн дундуур зөөлөн гулсана
Санааны угт бугших гунигийн дуу сад тавин цуурайлахад
Сар ёолон зүрхэн тушаа үхлүүт шархдана
Дорнын цагаан саран намбалагхан хэдий ч гунигтай
Долоон шидийн үйл амьдралд шингээд уйтай
Дотоод энгэр чичирсхийгээд л даруухан
Доголон цэнхэр орчлонд дутуу амьдрах доголон

У.Мөнхбаатар : Энэ охид

Бусад — Sat, 04 Feb 12 17:29:44 +0800

Энэ манай монголын охид нэг л биш болжээ

Эрдэнэ мэт биеэ хайрлахгүй мөнгөөр өөрийгөө олжээ

Цэвэр цусаа хадгалж үлдэж болохгүй байна уу

Цэнгэл жаргалын төлөө төрсөн мэт энэ охид яана

Охид цэвэр байвал төр түмэн чинь амгалан

Гэтэл тэр охидууд харийн өвөрт амгалан

Монгол бүсгүйн цэвэр төрхөө тэд мөнгөөр солино

Магадгүй маргааш тэд нар монгол нэрнээсээ болино

Эзэн хаан чингисийн бидэнд үлдээсэн цусыг

Энэ охидуудад зөндөө хэлээд хэзээ ч олохгүй тусыг

Чиний амьдрал бол бааранд сайхан харагдана

Чамд л гэж хэлсэн ээж аавын чинь арга барагдана

Насны зөрүү хамаагүй мөнгө л байхад болно

Нааш ир гэсэн болгоны өвөрт байхад л болно

Хэдэн жилийн дараа чи өөрийгөө ч танихгүй

Хэтэрхий амархан ч бас чи нүд анихгүй

Монгол генээ устгачихвал чамд сайхан байхуу

Маргааш гэж хэзээ ч байхгүй бол чи айх уу

Сэтгэл чинь чамд сайханыг л хэлж байгаа

Итгэл чинь мөн адил сайныг л хүсч байгаа

Тэгхээр чи бас чи монгол гэсэн сэтгэлтэй бай

Тийм ч учраас би хэлж байна ойлгосон гэдэгт итгэлтэй байна.

Н.Базардэрэг : Чанадын сэтгэл

Н.Базардэрэг — Thu, 02 Feb 12 15:01:17 +0800

Хун цагаан сэтгэл минь нууран дундаа чуулж
Хурмастын хөх тэнгэрт хайрын од харвалаа ч
Хором, хормоор урсах он цагийн эргэлтэд
Хожимдож ухаарсан бодол минь сэтгэл дундуур зурах юм
Амьдралын бартаат замд зовлон хурах үес
Алс цэнхэр хязгаарт хүсэл минь замхран одлоо ч
Омголон явсан сэтгэл минь харин
Орогшиж яс чанартаа үлдэхүй
Амь эрэн тэнцсэн ертөнцийн буурал тоонот дахь
Алдааг минь шүүн хэлтрүүлээч
Онгодтой эргэсэн энэ замбуулингаас
Одож алслахын зуураа би
Одтой явсан насаа аваад буцахад
Амьдралын тойрогт гортиглоогүй
Аяа, миний гэгээн сэтгэл л үлдэнэ.
Нарантуяагийн Базардэрэг

Н.Базардэрэг : Чанадын сэтгэл

Н.Базардэрэг — Thu, 02 Feb 12 14:57:31 +0800

Н.Базардэрэг : Арван зургаан нас минь

Н.Базардэрэг — Thu, 02 Feb 12 14:57:54 +0800

Мөрөөдлийн цагаан, гэнэн нас минь
Монгол гэрийн тооноор замхарч
Морин төвөргөөн шувуудын дуутай
Мөнх тэнгэрт халгин оджээ
Амьдрал ухаарлын алтан цогц
Арван зургаан нас минь
Хүрдэн эргүүлэгтэй насны хоймороос
Хайрын совин тээсээр ирлээ
Нарыг ч бөхөөх залуу насанд
Найргийн хур шиврэн орж
Гэнэн сэтгэлийн үгэн цэцгийг
Ган болтол хатаан ширээхүйд
Алтан гуутай мянган бурхан
Аашаа эвдэн бархиравч
Хүслийн чанад дахь гэгээн насыг
Харин үл салгаж чадна тэд надаас
Зонхов олон бурхадын
Зүрхийг татсан нас минь
Орчлон хорвоод оч болон цахилаад
Оройтсон их ухаарлыг аянга болон ниргэхүй
Учрал хүссэн зуурдын бие минь
Уудам ахуйд сэтгэлээ дагаад арилна
Арван зургаан нас минь ээ

Нарантуяагийн Базардэрэг

Н.Базардэрэг : Зөвхөн ээждээ

Н.Базардэрэг — Thu, 02 Feb 12 14:58:20 +0800

Үхэл, амьдралын учрал тохиол
Үүр шөнийн заагаар хагацахуй
Үүргэлсэн талын амгаланг цочоон
Үр нь болон ээждээ заяагаад
Сарны мөнгөн утас сүвлээд өнгөрөх жилүүдэд
Санчиг буурал ээжийгээ би
Сэтгэлийн гүнээс хайрланам
Исэр гилбэртэй их хайранд тань
Ингэн туйлаадас шөнөдөө хайлдаг юм аа
Илдний ган шиг хатуу сургаалтай
Ижий гэдэг бурхад минь ээ
Сүү, хайр эвлэсэн үгэнд тань
Сэтгэлийн гуниг чанаддаа ариусдаг юм
Сүслээд хөгжөөх маанийн зургаан үсэг шиг
Сургаал дээд хайр эрхэм ээж минь
Нулимс амтлах цагаан гуниг
Нар бөхөх жаргалын төгсгөл рүү
Нэг насыг нь аван зэллэхэд
Нялх хэнз сэтгэлд минь харин
Найргийн дугараа тодхон үлдэнэ
Ирэх буцах хоёрхон гарцтай орчлонд
Ижийгээ л хүмүүс минь хайрлацгаа
Зөвтэй, буруутай амьдралын алтан аргамж
Зөвхөн ээждээ дуулах шүлэг минь энэ буюу

Нарантуяагийн Базардэрэг

Н.Базардэрэг : Аавдаа

Н.Базардэрэг — Thu, 02 Feb 12 14:58:03 +0800

Хайр, хал амилсан үг тань ааваа
Хэлтгий заяа тэгшлэх адис юм
Хос тулахтай орчлонгийн жамд
Хэлж ирдэггүй зовлон зөндөө олон
Хазайх цагтаа таныгаа түшихэд
Харц тань зүрхэнд ухаан заадаг
Гэнэн үг уриар дээжлээд
Гүн утга танаасаа л олдог
Нар ороолдсон цагийн цонхоор
Би таныгаа ширтнэм
Нас хорголох саарал өдрүүд
Зүүдэнд зэллэнэм
Намрын салхийг алгаараа
Илбээд нэг дундлахуй
Намайг гэж биеэ умартдаг
Аавыгаа илүү ойлгоном би
Алтан бумбалтай рашаан хүртээгээгүй ч
Агар салхины хээлэнд нар хүлхүүлж жаргаагаагүй ч
Асга шаширын хойморт ар хэцэлж өнжүүлээгүй ч
Арга холбох шар гэгээнд аав тандаа л хайртай

Нарантуяагийн Базардэрэг

Н.Базардэрэг : Эмээ минь

Н.Базардэрэг — Thu, 02 Feb 12 14:57:44 +0800

Наран эргэлттэй амьдралын харгуйд
Насан эргэлттэй төөргийн гүнд
Ачлал хайраа наддаа л гэсэн
Амьд тарни эмээ минь
Арван сар амь тээж хүй холбоогүй ч
Ахуй гэнэн цагийн шүтээн минь
Нуугдахын эрхгүй хүүхэд үе минь
Нуруун дээр тань өнгөрсөн
Дөрвөн цаглашгүйд үүрд санах
Дурсамж бүхэн таны сургаалаа
Нэрээ ч хүртээгүй нялхад минь
Нойтон сормостой бүүвэй аялаагүй ч
Ниргэх аянгатай өсөхийн жаргалыг
Нүглээс хаасан бурхан эх минь

Ц.Баттуяа : ТОРЛОГДСОН ХАЙР

Ц.Баттуяа — Thu, 02 Feb 12 13:05:04 +0800

Төгсгөл нь үзэгдэхгүй урт зам. Түүний цаана чи зогсоно.

Чиний яг эсрэг талд би зогсоно. Яг зуун жилийн өмнө бид энд ирж зогссонсон. Тэгэхэд ногоон гэрэл асчихсан байсан. Одоо ч бас ногоон гэрэл асчихаж. Торойх ганц машин, ганц хүн ч энэ зам дээр, энэ замын ойр хавьд ч алга.

Чиний харцанд инээмсэглэл ч алга. Бас нүдэнд чинь гуниг ч алга. Замын дохиолуур ногоон өнгөөр гэрэлтэж, чамайг над руу ирэхэд юу ч саад болохгүй. Гэхдээ мэдээж чи над руу ирэх ёсгүй. Учир нь чи наашаа ганц л алхвал улаан гэрэл асч, хаанаас ч юм үй олон машин гарч ирээд, чиний амьдралыг төгсгөнө.

Миний харц асар их догдлол, бас түүнээс ч илүү эмзэглэл, айдастай. Тэр бүхэн бүгд нэгдээд миний бяцхаан зүрх рүү довтолно. Ногоон гэрэл асаалттай. Уг нь бидэнд л үйлчлэхээр зохиогдсон тэрхүү амьдралын тухай хуулиар бол би л чам руу очих учиртай. Тэгвэл бид хоёр тэврэлдэн учралдаад, тэгээд хэзээ ч хагацахгүйгээр мөнхийн хайрандаа умбан жаргана. Гэвч би чам руу очьё гэж бодсон ч хөл минь хөшчихөж. Би алхаж чадахгүй байна. Хэтэрхий их бардамнал, асар их хайр минь хоёр хөлийг минь тушчихаж.

Ц.Баттуяа : ТЭР ЗАЛУУГ САРНААС ДҮҮЖИЛБЭЛ ТААРНА

Ц.Баттуяа — Thu, 02 Feb 12 13:02:04 +0800

***

Надад хайртайгийнх нь төлөө

Тэр залууг ч бас

Сарнаас дүүжилбэл таарна

***

Тэр

Өчигдөр татсан тамхиныхаа акрукыг цуглуулж

Өөдөсхөн сонинд нямбайлан ороогоод

Асааж

Тааламжтай тамшаалж сууна

Хаа нэгтээ орхисон, гээсэн, голсон, учирсан амрагуудаа

Цуглуулж

Ийнхүү тамшаалвал ч...

2009-1-11

Ц.Баттуяа : ЧАМАЙГ ХЭЗЭЭ ИРЖ АРГАДАХЫГ МЭДЭХГҮЙ Ч...

Ц.Баттуяа — Thu, 02 Feb 12 12:59:53 +0800

***

Битгий гэж хэлэхийн завдалгүй

Сэтгэл дээр минь чи

Шаржигнатал гишгэчихлээ

Тэгээд над руу эргэж хараад

Ямар их чимээтэй навч бэ гэж

Хэнэггүйхэн өгүүлэв

2008.09.06

***

Салаа гэзэгтэй нас минь

Чиний харцнаас бишүүрхэж

Саахалтын уулыг даваад одоход

Чамд хайргүйгээ ухаарсан…

2005-10-27

***

Чамайг хэзээ ирж амтлахыг мэдэхгүй ч

Ахиад л би дарс нэрж сууна,

Нулимсаараа

Чамайг хэзээ ирж аргадахыг мэдэхгүй ч

Ахиад л би уйлж сууна

Зүрхээрээ…

Ц.БАТТУЯА 2008.08.15 http://salkhi-met.blog.banjig.net

Ц.Баттуяа : ГАНЦХАН ЧИНИЙ ӨЛМИЙД Л СӨГДӨЖ УРГАСАН...

Ц.Баттуяа — Thu, 02 Feb 12 12:51:15 +0800

Намайг сахиж

Цонхон дээр минь хонодог

Тэргэл саран

Өнчин лааны минь гэрэлд дарагдаад

Гав ганцаар гуниглаж үүр цайлгав

2011-02-13

***

Ахиад уулзахгүй байх вий гэсэн

Айдасыг минь хөөж

Хацрынхаа энэ өхөөрдөм хонхорхойгоор

Дэнчин тавин

Хэзээ ч хагацахгүй ээ гэж

Тангараглаж чадах уу?

2011-02 сар

***

Ганцхан чиний өлмийд л сөгдөж ургасан

Цэцэг байхыг хүснэм

Нулимсаар чинь бус инээдээр чинь услуулж дэлгэрдэг

Нүцгэн дэлбээгээрээ харцыг чинь татсан

Цэцэг болохыг хүснэм

Ц.Баттуяа 2011-03-17 http://salkhi-met.blog.banjig.net