BIIRBEH.MN by Bataka - Лха Отхан : ЗАМЫН ТУХАЙ ШҮЛЭГ

Сэтгэлээр зэргэлээтэх нүүдлийн цуваанд дайгдсан

Сэвшээ салхи, сэмхэн гуниг надаар өртөөлнө

Сэлэнгэ мөрний урсгал шиг алсын харгуйг зүглэх

Сэрүүн зүүдний хязгаарт аавтай минь уулзуулах замын тухай

Өрөөлд биш өөртөө би заримдаа зам хайдаг

Өмнө минь дурайх замаас би шалтгаан эрдэг ч

Өөрийг минь таллах хувь заяаны алтанхан заадалтай

Өнө хожид, алс ирээдүйг зүглэх энэ замын тухай эргэцүүлж нэг тунгаахын учир...

Өртөө дамнах нутгийн салаа замууд

Өөрөө туулсан өнөө л бор замууд

Зөгнөж таагаагүй замууд

Зөнгөөрөө үдлэх харууслын дунд тоостой замууд

Үүр цүүр зүүдлэх эцгийн голомт удмын алтанхан зам

Насан балчир бодлын минь өмнө сүүмэлзэх замууд

Аль ч замаар бие, сэтгэл минь хөвөрлөө гэсэн

Айлсах ханьгүй бодлын зам нэг л зүгт хөтөлнө

Жингийн тэмээдийг үдэх санаа алдам тэр уйтай зам

Жим жимээр хөтлөх буцахын хэмнэл дуутай зам...

Хорвоогийн будант нүүдэл дунд намайгаа үлдээсэн

Ховорхон жаргасан эцгийн минь сэтгэлийг ойртуулсан зам

Жин жингийн цувааг аядуухан хөтлөөд хүү нь нүүж байна

Жирийн бор өвгөн эцэг минь танруугаа би ойртон нүүнэ

Энэ хорвоод эхлэл гэж байдаг бол

Эргэж хараагүй харгуй чамд эхлэл гэж байсан бол

Энэ хүн миний, бас амьдралын минь эхлэл

Энэлэн санахын минь учир, эргэн дурсахын минь шалтгаан

Хэзээ нэгэнтээ урсаад одсон их мөрөн шиг зам

Хаа ч юм бэ уусан цуурайлах сэтгэлийн аялгуутай зам

Хэнээр ч орлохгүй түшиг минь та байж

Хэзээ ч мохоогүй эцгийн харамгүй сэтгэл та байжээ

Хан тэнгэр шиг тэнгэрлэг эрийн орхисон зам

Хаа холын замд хүүдээ хоргодсон эцэг зам

Намрын халуун өдрүүдийн тоосон дунд олсон зам

Наранд ээгдэж, салхиар зуурсан зам захиас чинь байж...

Нанчид ээрсэн салаа замаас намайг холдуулсан хатуу зам

Намайг эрэх тунирхал дүүрэн аав зам

Надаасаа холдсон ч зүрх тогшсон бороотой зам

Нас дагуулах нүүдэл шиг амьдралын үнэн зам

Аав минь дээ...

Сэтгэлээр зэргэлээтэх нүүдлийн цуваанд дайгдсан

Сэвшээ салхи, сэмхэн гуниг надаар өртөөлнө

Сэлэнгэ мөрний урсгал шиг алсын харгуйг зүглэх

Сэрүүн зүүдний минь хязгаарт аавтай минь уулзуулах нүүдлийн зам

Өөртөө биш өрөөлд би заримдаа захиас хайдаг ч

Өр төлөөс болж өөрөө би бүдэрчихдэг

Өмнө минь дурайх үгсээс би шалтгаан эрдэг ч

Өөрийг минь таллах хувь заяаны алтанхан заадалд

Өнө хожид, алс ирээдүйг зүглэх энэ замыг туулж л ухаарахын учир байж.