BIIRBEH.MN by Bataka

Аргадан аргадан уйлавч, ааш нь олдохгүй хорвоо
Алиа багахан хүүтэйгээ эртхэн учрах нь яав даа
Алаглан алаглан ургавч, амархан гандах цэцэгс
Амьтны жаахан үрэйгээ хэдий болтол уймрах вэ

Ээжийн оёсон дээлийн энгэрийг норгож уйлсан ч
Энэ л яваа насанд оройтсон хайр минь дээ
Эгчийн хэлсэн үгийн эрчийг сулруулж бодсон ч
Эрэвгэр бага охинд дассан сэтгэл минь дээ

Долоон бурханыг зүсэлж дотнохонтүүндээ өгөөд
Дорын намуун шөнөөр догдолж явсан минь дээ
Намар оройн чөлөөнд хэн хэндээ уусаж
Нарт ертөнцийг аргадаад наадаж явсан үе минь

Дэгдээхэйгээ дагуулаад хосоор ниссэн ангир шиг
Дэлхий дээр би чамтайгаа бардамхан ч явдагсан .
Шиврээ намуун бороо нь элэг зүрхийг дэвтээж
Шивнэж ярьсан үгсийг уулс чимээгүй сонсдогсон.

Далиун намын буга нь хааяа хааяа урамдаж
Халуун бүлээн нулимс, хацар дагаад бөмбөрнө.
Халхын сайхан охиныг хайрлан хайрлан уужраад
Хархан нүдэнд унаж, нүгэл буяныг мартана.

Богд дөрвөн уулын хормой юугийг нь дэрлээд
Бор борхон зүрхээ чагнаж хэвтдэг юмсан
Босон суун жиргэх хөөрхөн болжморы нь өхөөрдөөд
Борог өвсөн дунд нь хэн хэнээ энхрийлдэгсэн

Санаа алдах тоолонд намрын навчис унаж
Саран гэрэлтсэн өдрөөр санчгий нь илбэн эрхэлдэгсэн.
Эрдэнэт хүн болж энэхэн дэлхийд төрөөд
Эртний сайхан ерөөлөөр чамайгаа хүлээж явж дээ...

Дөмөн дөмөн урсгалтай намрын голын хөвөөнд
Дөлгөөн дөлгөөн ширтэлцсэн дөрвөн алаг нүдээ
Наран саран ээлжилсан намуун энэхэн хорвоод
Найгалзсан цэцгийн дунд найрсан нийлсэн хайр аа

Зургаан сарын настай цэцгүүдийг өрөвдсөн юм сан
Зуун жил хагацалгүй жаргахыг мөрөөдсөн юм сан
Зуурдын ертөнцийг мөнхөд санан дуулсан юмсан
Зурвасхан амьдралыг үүрдээр бодон амьдарсан юмсан .

Алтанцэцэг ээ, нохойгоо хориорой! гэж дуудаж явсан
Алиахан бага нас минь ахиад наддаа ирэхгүй ч
Амраглан хайрлаж ардын дуундаа уярсан минь
Аялгуут шанзны үзүүрээс салхин болж гарнаа !

Алчуур алчуураар уйлавч асгарч барахгүй нулимс
Амраг чамайгаа гэсээр ч амьдарч чадаагүй гаслан
Андуурч андуурсаар явавч таньж бараагүй хорвоо
Ах нь, ах нь гэсээр алдаж орхисон тавилан...

Тоолшгүй жилийн чанад уулс байж дээ толгод минь
Томорсоор томорсоор эр хүн болж дээ хүүхэд минь
Нам гүмхэн амьдарсаар нартыг элээх юмсан, өвгөд минь
Надаас чамайг харамлаагүй энэхэн буурал хорвоо!

Арсгар барсгар хад нь арслан, барс ноцолдох шиг,
Ажиж сайн харвал эртний нүүдэл айсуй шиг,
Алчуураа дэрвүүлсээр чи минь хөсөг тэрэг хөтлөх шиг,
Албин шидтэй ертөнцөд ирэх л ёстой байж дээ

Задгай цагаан үүл нь хэсэг бусгаар нүүнэ
Залуу багахан Анимаа минийхээ аясаар гэгэлзэнэ
Хэрмэл цагаан үүл нь энд тэндгүй нүүнэ
Нэнз багахан Анимаа минийхээ аясаар сэрвэлзэнэ

Өвс ногоо нэлдээ хөдөлгөөнд орох намраар
Өмнө зүгийн уулс минь өндөлзөн өндөлзөн үзэгдэнэ
Өөрийн гэсээр яваад хүний үрд алдахгүй ээ, би
Өвөр дүүрэн нулимстай ч, өнгөцхөн хорвоод бүдрэхгүй ээ !

Саруул намрын тал нь алслан алслан цэлийнэ
Сайн хүний үрийг салаад явсан ч санана ...
Эрүүл салхин бүжиж урсгалаар тал минь долгилж
Эр, эм хүний сэтгэлийг хөдөлгөн гижигдэнэ...

Хаяагаар сэвэлзэх салхи нь харихын уйтгар төрүүлнэ
Хайрлан хайрлан дассан ч, хааяахан бас гомдоно...
Хаалгаар сэвэлзэх салхи нь халуун гунигийг өдөөнө.
Халширан халширан дасаад, харьж буцах замгүй ээ!

Түмэн агтын дундаас ганцаараа содон шарга минь
Түмэн охидын дундаас ганцаараа сайхан Аньмаа минь
Огторгуй олон оддоос ганцаараа содон наран минь
Орчлонгийн олон бүсгүйгээс ганцаараа сайхан Анимаа минь

Өвгөн буурал эцгээсээ адис нэг авахгүй бол
Өнийн ёсыг зөрчиж, азын тавилан хэлтийнэ...
Эмгэн буурал ээжэээсээ ерөөл нэгэн хүтэхгүй бол
Эртний жамыг зөрчиж, элдвийн ховонд өртөнө...

Алтай дээгүүр гийдэг алтан наранд өссөн юм
Арвууланг минь төрүүлсэн аав, ээж хоёртой юм.
Бууж мордох хорвоодоо буруу мөргүй явъя
Буянт хайрын заяанд хир суулгалгүй өтлөе!

Үдэш орой болтол Анимаатайгаа хоёул хөтлөлцөөд
Үүргэлсэн моддыг сүлжин, мөрөө гаргаж явсансан
Бугын эвэр шиг мөчрийг бүлээн гараараа илбэхэд
Будан нэвтлэгч саран, цагаан гөрөөс шиг харагдана

Цагаахан хусыг нарс мод хөтлөөд явах шиг
Цаг хугацааг туучин ойн дундуур алхалсан
Янагийн минь магнайд долоон бурхан гэрэлтэж
Яг миний зулайд гурван марал шүхэрлэнэ

Хашааны нөмөрт сууж цээжинд нь нүүрээ наана
Хавирган сарыг үснийх нь чимэг болгон тоглоно
Хааяа санаа алдахад өвс ногоо сэрвэлзэнэ
Хяруу унасан шөнө л цагаан далавчаа дэлгэнэ

Хар малгайтай, таяг тулсан хүн хажуугаар өнгөрнө
Хайрт минь айсхийж, миний цээжинд наалдана
Зүгээр, бүү ай, юу ч болоогүй... гэж би тайвшруулна
Зуун айлын тооноор ганц нэг оч гялсхийн унтарна

Алтан жуузтай тэргэнд Кришна тэнгэр заларч
Агаар сэнгэнүүлэн өнгөрөхөд намрын цэцэгс үнэртэнэ
Өлзийт энэ үдэш, чи минь Долоон бурханы охин !
Өвдгийг чинь дэрлэсэн би Гурван маралын хүү!

Амьдарч яваа өдрүүдий минь цорын ганц чимэг
Аялж яваа дууны минь ерийн бус эгшиг
Үл мэдэгхэн сэвхтэй, уянгалаг жаахан Анимаа
Үдшийн зүүд эзэгнэж, үүрийн нойр хулжаана

Ертөнцийн найранд уригдаад, чамайгаа олж харсан би
Ерөөл тавиланд минь үүнээс илүү хувь бий гэж үү !
Зүүд шиг хоосныг гатлаад энэ хорвоогоос явахдаа би
Зүрхээ хайраар дүүргэн Анимаагаа дагуулаад буцна!

Дээвэр дэвсэн салхинд дэнжийн ногоо шарлана
Дэлхийд ирээд буцахдаа дэмий бодлоосоо сална
Өрх дэвсэн салхинд өвсний толгой гандана
Өөрийн болгоод авсан ч өнөд зүрх минь шимширнэ.

Сэрүүн намрын огторгуйд найман тогоруу ниснэ
Сэтгэлийн хүйтнийг бүлээсгэж, намайг дагуулан ниснэ
Уул уулыг давсаар оюун сэтгэл минь ниснэ
Уйтгар хүйтэн жаврыг Анимаагийн илчээр давна ...

Дуниартагч энэхэн дэлхийдээ мөнх л амьдрахгүй хойно
Дуу болгож хувиргана Анимаа минь, би чамайгаа
Цайвартагч энэхэн дэлхийдээ мөнх л үлдэхгүй хойно
Цагийн цагт амьдрах хайр болгоно, би чамайгаа

Найган найган найгаад л намрын хорвоо сүүмэлзэнэ
Надад заяасан хүний үр, ийм л нэгэн Анимаа ...
Найрсан найрсан найрсаад л навчсын сэрчигнээ шаргина
Насандаа мартамгүй хүний үр, миний л нагэн Анимаа

Ааш зангий ялдамд нь арслан барс ч номхормоор
Ардын дууны гүнээс өөрөө гараад ирсэн гэмээр,
Огторгуйн дунд эргэлдэгч зууван энэ дэлхий дээр
Олон мянган жилд нэг л ирсэн амраг минь

Үлэмж эртний дэлхий минь огторгуйн уудамд ганцаардаж
Үүлэн зардас илгээж, Галидаас чамайг минь эржээ...
Тоолшгүй цагийн тэртээ миний л гэргий байсан чи
Толгод, тэр цагт сүрт их уулс байсан юм шүү!

Дэлхийн уул талаар дагуулж явсан би, чамайгаа
Дэнж нугын сая сая цэцэгс өлмийг чинь үнэссэн...
Есөн намрын сүмэн өвсний үнэрт мансууран цэнгэж
Ертөнцийн бүх гол мөрний усанд гэзгийг чинь норгосон!

Бөөн бөөнөөр цогцловч, бүгд замхрах үүлэн адил
Бөөрөнхий орчлонд цугаар ирэвч, цуварсаар явна
Саглагар модны сүүдэрт сайхан чамайгаа тэвэрсэн ч
Салаад одохын цаг нь хожмын нэгэн өдөр дд !

Үүлэн чөлөөний нар шиг энэ л яваа насандаа
Үйлийн үрээр учирсан бидэн хоёр хөөрхий
Үдийн наран бүлээхэн ч, үдшийн сар нь хүйтэн
Үерийн ус шиг сэтгэлийн аясыг дагах хэцүү

Эрвийж сэрвийсэн хайлаас, энүүхэн майханд навчилжээ
Эрдэнийн цагаан зандан, тэртээ ууланд ургажээ...
Энэ л хоёрыг нийлүүлээд нэгн доор суулгавал
Эртний жамаар төрөлсөөд ижилдэн улбах тавилантай...

Хоёр өөр ууланд нь хорвоогийн жамыг дагуулвал
Холоос биесээ үгүйлсээр, хорчийж хатах нь лавтай
Долоон бурхан одод нь хайлаасны мөчиртөө асаж
Доголон нулимстай тэр минь минийхээ цээжийг түшнэ

Саран хээр хоносон саруул намрын өглөө
Салхиар ганхах өвсөнд мөнгөн хяруу цавцайна
Санасаар яваад уулзсан ч, санаа сэтгэл гэгэлзэнэ
Сайхан төрсөн Анимаа минь шанзаа түшээд мэлмэрнэ .

"Эрдэнэ засгийн унага" уяан дээрээ үүрсэнэ
Энэхэн замбуулингийн тоосыг эрийн ёсоор туулъя
"Эр бор харцага" нь аялгуун дундаасаа цойлно
Эрэвгэр жаахан түүнтэйгээ эртний ерөөлөөр золгоё.

( Сэтгэгдэл бичих? | Шүлэг | Оноо: 5/1 | Дашбалбар О )

Манай сайт танд таалагдаж байвал LIKE хийгээрэй. Танд баярлалаа.

Санал сэтгэгдэл

Санал асуулга

Та нэг жилийн хугацаанд хэр олон ном худалдаж авсан бэ ?
	Ном худалдаж аваагүй
	1-3 ном худалдаж авсан
	4-7 ном худалдаж авсан
	8-11 ном худалдаж авсан
	12-с дээш ном худалдаж авсан

Санал асуулгын дүнг үзэх

Ном

Шуурайн Солонго: Гималай

Шуурайн Солонго: ТООРОЛЖИН

Ш.Сундуйжав : Үүр цайж байна

Э.Үржинханд : Хос ном мэндэллээ

Б.Болдсүх : Таг мартсан тангараг

Ч.Дагмидмаа

Санал асуулга

Та манай гишүүн болохыг хүсвэл энд дарна уу.
t
Одоо онлайнд 165 зочин 0 гишүүн байна.

Мэдээлэл оруулах

Та бүхэн өөрсдөө шүлэг, өгүүлэл оруулахыг хүсвэл энд дарж нэмж болно.

Та монгол гарын драйвэр ашиглан бичээрэй. Оруулсан мэдээллийг админ үзээд идэвхжүүлнэ.

Санал хүсэлтээ илгээх

Зургийн цомог

Должин : Зам зуур
zam-097.JPG
Хэмжээс: 600x450 110k
Сэтгэгдэл: 0
Үзсэн: 5342

IMG_1015.jpg
Хэмжээс: 600x800 169k
Сэтгэгдэл: 0
Үзсэн: 4595

ХХ. Энхцог 50х150, зотон тос
Он цаг
Хэмжээс: 600x1883 426k
Сэтгэгдэл: 0
Үзсэн: 5436

Агуулга

Monday, 2024.07.01
·	Э.Үржинханд : Он цагийг өртөөлсөн ...
·	Э.Үржинханд : ӨӨРИЙН МИНЬ АХАН ДҮҮС
·	Э.Үржинханд : БАЙГАЛИЙН БОЛЗООНД
·	Э.Үржинханд : ҮЗЭГНИЙХЭЭ ҮЗҮҮРЭЭР
·	Э.Үржинханд : ДЭЛГЭР ЗУНААР
·	Соёрхын Пүрэвсүрэн : НААДАМ ДӨХЛӨӨ ДӨӨ... ХАНЬ ГЭЖ...
·	Э.Үржинханд : ТАНИЛ ГУДАМЖААР
·	Соёрхын Пүрэвсүрэн : НҮҮДЭЛ
·	Г.Мөнхтулга : ДУРЛАЛ
·	Г.Мөнхтулга : “293”
·	Г.Мөнхтулга : . ӨӨДГҮЙ АМЬТАН
·	Г.Мөнхтулга : ХАЙР УДАХГҮЙ ИРНЭ
Saturday, 2024.03.30
·	Лха Отхан : ӨӨР ДУУНД УЯРАХГҮЙ
·	Лха Отхан : ЦАСНЫ УТГА УЧИР
·	Лха Отхан : ХАРААЦАЙ НАС
·	Лха Отхан :ӨНГӨРСӨН БҮХЭНД УТГА УЧИР
·	Лха Отхан : ДУРСАН САНАХ БАЛЧИР НАС ...
·	Лха Отхан : ҮХЛИЙГ ҮЗЭХ Л ҮЛДСЭН...!
·	Лха Отхан : ЭЛСНИЙ ЧИМЭЭ
·	Лха Отхан : АМЖИЖ ХАЙРЛАХААР ХОРВОО ДУТДАГ
·	Лха Отхан : ГИТАРЫН УТСАН ДАХЬ САРНЫ СОНАТ ...
·	Лха Отхан : ДӨЧИН ДӨРВӨН НАМРЫН ДУУ
·	Лха Отхан : БУРХАНГҮЙ ЕРТӨНЦИЙН УУЛС
·	Лха Отхан :ШУВУУД ИРЖ БАЙНА
·	Лха Отхан : СҮҮЛЧИЙН ТУХАЙ ХҮНИЙ ЗҮҮД ...
·	Лха Отхан : ДУУСАЖ БАЙГАА БИДНИЙ АМЬДРАЛ
·	Лха Отхан : Урсгалд хөвөх навчисыг он жилүүдтэй үдэж ...
·	Лха Отхан : ӨВСНИЙ АМЬДРАЛ
·	Лха Отхан : ЭХ НУТГИЙН ТУХАЙ ДӨРВӨЛ БОДОЛ
·	Лха Отхан : Шөнийн ганцаардал минь
·	Лха Отхан : БҮҮДГЭР ТЭР ХОТ МИНЬ
·	Лха Отхан : ХУУЧИН ХАЙР ...
·	Лха Отхан : ЗАМЫН ТУХАЙ ШҮЛЭГ
Monday, 2024.03.04
·	Б.Явуухулан: Сонин сурвалжлагчид ярьсан нь
Thursday, 2024.01.25
·	Г.Мөнхтулга : ХАЙР
·	Г.Мөнхтулга : ТҮҮНД
Thursday, 2023.12.21
·	Г.Мөнхтулга : ХОТЫН ШӨНӨ
·	Г.Мөнхтулга : ЧАМД
Tuesday, 2023.12.12
·	Долгорын Цэнджав : ТАМГА
Tuesday, 2023.12.05
·	Г.Мөнхтулга : Зүүд

Та сараа сонгоно уу

Хажууд нь хүмүүн мишээн гэрэлтэхэд Халиун дэлбээгээ дэлгэн баярладаг Инээхийг хүртэл эсэндээ мэдрэх Ижий сүнстэй Сарнай цэцэг

© Copyright 2005-2025 Biirbeh.MN. All rights reserved. By Bataka	Манай сайт танд таалагдаж байвал LIKE хийгээрэй. Танд баярлалаа.
Утас : 976-99076364 И-мэйл :info@biirbeh.mn