“Шүүх эмнэлгийн дүгнэлтээр Туулын бургасанд ээждээ хаягдсан тавхан хоногтой нярай хүүгийн бие ямар ч согоггүй эрүүл хүүхэд болох нь тогтоогджээ.” “Эх нялхасын эрдэм шинжилгээний төвд төрүүлсэн хүүхдээ хаяж зугтсан ээж баривчлагджээ.” “Усан сангийн гудамжинд цоо эрүүл нярай хүүхдээ гялгар уутанд амьдаар нь хийгээд амыг нь скочидсон байжээ.”  “Хүүхдээ 00-д хаясан эх олдсон байна.” “ Хүү нь наадмаар аавыгаа хөнөөжээ.” “ Ихэр хүүхдүүдээ нохойн хоол болгожээ.”

Энэ бидний хаанаас ч элбэг олоод уншчих бараан мэдээний нэгээхэн хэсэг.  Төрүүлсэн үрээ шавьжнаас дор үзэх жигшүүрт ээжүүд, төрсөн эцэг эхтээ араатнаас дор хандах үр хүүхэд...  Хүний дотор хэн байгааг мэдэхэд таашгүй ийм харгис ертөнцийн нэгээхэн өнцөгт дөрвөн мөчгүй төрсөн ч сэтгэл гэгч эрхтэнийхээ бүтэн заяагаар дундуур бүхнээ дүүргэж,  2012 оны 12 сарын 12 нд  хуримаа хийж, 2013 оны 2 сарын 13-нд хүүтэй болж бусдаас дутахгүй сайхан амьдарч яваа залуугийн амьдралаас уншигч танаа хуваалцъя.

Роликон дээр тэгнэж өнгөрүүлсэн бага нас

Энгэрт нь уураг ивлэж, сэтгэлд нь хайр саамшиж, 10 сарыг тэсэн ядан хүлээсээр өлгийдөж авсан хүү нь гаргүй хөлгүй мухар байхыг хараад хичнээн ээж тэсч, хичнээн аав тэвчиж чадах байсан бол.  

Youtube  сайтад тавигдсан “ No Arms, No Legs, No Worries” буюу “ Хөлгүй, гаргүй, санаа зовнилгүй” хэмээх урам сэргээх идэвхжүүлэлтийн цуврал видеогоороо цахим ертөнцийг байлдан дагуулаад байгаа Ник Вюжисик гэгч царайлаг залуу 1982 онд Австралийн Мелбүүрн хотод мэндэлжээ. Хөгжлийн бэрхшээлтэй хүүхдийн тусгай сургуульд сурч байхад нь сургуулийнх нь танхай хүүхдүүд түүний хөл гаргүйгээр дээрэлхэж, ихээхэн сэтгэлийн гутралд оруулж байсан болохоор 8 настайдаа амиа хорлохыг завдаж, 10 насандаа угаалгын өрөөнийхөө онгоцонд живж үхэх гэж хүртэл оролдож үзсэн байна. Өрөөл татуу хүүгээ устгаад хаячихаж болох байтал харин ч эсрэгээрээ өв тэгш хүмүүжүүлж, эрхтэн бүрэн бүтэн хүний ч чадахааргүй ихийг сургасан аав ээжийнхээ хэмжээлшгүй хайрыг ухаараад амиа егүүтгэх бодлоо Ник үүрд орхисон байна.  

Багачуудын хөлөөрөө гишгэж зогсоогоороо явдаг ролик гэгч жаахан дугуйтай тавцан дээр цээжээрээ тэгнэн “хэвтээгээрээ зорчсоор” Никийн хүүхэд насны өдрүүд өнгөрч. Хүмүүний амьдралыг газраас сөөмхөн өндөртэй энэ дугуйт тавцан дээрээс харж, амьдралын утга учрыг дээрээс биш доороос харж ирсэн тэрээр эдүгээ элэг бүтэн эрхтэн бүтэн хүмүүсийн сэтгэлийн гутралыг эмчлэх сайн үйлсээ хэдийн эхлүүлчихсэн од болон гялалзаж явна.

Эхийн хайраас ухаарсан сэтгэлийн тэнхээ

Гадаа гэртгүй гүйлдэж, гар хөл хоёроо хөдөлгөж байж л сэтгэлийн жаргал эдэлдэг аятай хоромхон ч зүгээр суудаггүй томоогүй хүүхэд насных нь өдрүүдийг Никийн ээж ямархан тэнхээгээр давж туулсан бол.

Ник өдөр бүр Бурханаас гар хөлтэй болгож өгөхийг гуйн залбирдаг байсан ч энэ гуйлтын хариу нь ирдэггүй байлаа. Үргэлж амиа хорлохыг завддаг хүүдээ нэг өдөр тэрээр аймшигтай царайтай өрөөл татуу хүнтэй ярилцсан сонингийн нийтлэл авчирч харуулжээ. Тэгэхдээ ээж нь түүнд: “ Ийм аймаар байсан ч ээж нь түүнийг маш ихээр хайрладаг” гэж хэлсэн байна. Үүнийг хараад тэрээр дөрвөн мөчгүй заяагаа хүлээн зөвшөөрч бодит байдалтайгаа тэмцэж эхэлсэн байна.

Ник бага багаар гар хөлгүй амьдралдаа зохицож хэний ч тусламжгүйгээр шүдээ угааж, үсээ самнаж, өрөвдмөөр жаахан хөлийнхөө хуруун завсар харандаа тогтоолгож энгийн хүүхдүүдээс ч чадварлаг зураг зурж хүний төсөөлөхөөргүй чадваруудыг эзэмшжээ.

Түүгээр ч үл барам усанд сэлж, гольф тоглож, агаараар нисч, хөлөөрөө бөмбөр тоглож бяцхан хөлийнхөө өсгий, хоёр хурууныхаа тусламжаар компьютер дээр минутанд 45 үг бичдэг болж, сэтгэлийн тэнхээгээ харуулсаар байна.

“Тэнгэр өөд харах бүртээ амьд гэдгээ би мэдэрдэг...”

Жаахан ч гэсэн амсхийх газар хайж

Заримдаа би дэндүү ядардаг

Наран  өөд харах бүрт минь

Намайг  тайвшруулдаг гэрлийг мэдэрдэг

Өөрийн минь амьд гэдгийг мэдүүлдэг

Өндрөөс өндрийг  би олж хардаг...

хэмээн өгүүлдэг “ Something more”  дууныхаа клипт тэрээр хүүхэд насныхаа дутуу заяаг харуулсан бичлэгээ оруулж “ аравхан насандаа би амьдрах найдвараа алдаж байсан...” гэж гунигтайгаар өгүүлэх аж.

Өгөх хайрын үнэтэйг ухааран ээжийнхээ сүлсэн сэтгэлийн ертөнцөө дунд сургуульд байхаасаа эхлэн дүүргэж амжилттай суралцан, гуниг зовлонг мартах сэргээш болсон ухаарлын лекцүүдээ өнөө хэр нь тавьсаар явна.

Нягтлан бодох эдийн засаг төлөвлөлтийн давхар мэргэшсэн зэрэгтэй, сэтгэл зүйн ухааны лектор, номлогч Австрали улсын уугуул иргэн Ник Вюжисик тэвчээрийн дээдийг харуулсан ухаарлын сүлжээгээрээ гартай байж гар сунгадаггүй, хөлтэй байж хөл алддаггүй, ухаантай байж ухаардаггүй хүмүүсийн сэтгэлийн ядуурлыг бууруулах хөрөнгө оруулагчийн сэнтийд инээмсэглэсээр “алхана.”

Таван хэмжээст ертөнц

YolHad_35.JPG
Хэмжээс: 700x525 162k
Сэтгэгдэл: 0
Үзсэн: 4145

mongolia2007year-009.JPG
Хэмжээс: 600x450 105k
Сэтгэгдэл: 0
Үзсэн: 3947

Хавар
Хэмжээс: 600x508 89k
Сэтгэгдэл: 0
Үзсэн: 6483