|
|
Вэб сайт хийнэ, байрлуулна ...
|
|
Хайх
Та эндээс шүлэг өгүүллэг хүссэнээ хайж болно...
|
 Шүлэг: Б.Улаанхүү : Азарганы чадалтай архангайн аварга
Оруулсан admin on 2016-07-16 11:06:33 (4298 уншсан)
Азарганы чадалтай архангайн аварга
Хөх монголын хүчитний эгнээнд
Хүчтэй чадалтайд тооцогдож ирсэн
Хөвчийн хүрэний чадалтай аварга
Хөдөөнөөс төрсөн хангайн аварга
Хаанаас нь ч харсан халхын хүчтэн
Хашаатын нэрийг дуурсгах аварга
Ширмэл зодгийн сэнжигнээс сэгсэрч
Шилдэж дугтран хавирч байгаа нь
Шөрмөстөө амьтан тэсхийн аргагүй
Шийдсэн хавираатай шинэхэн аварга
Ширүүлж цочоовол дайрч унагах
Шидтэй хүчтэй хангайн аварга
Арын сайхан цэнхэр хангайдаа
Адуун дээр өссөн аатай аварга
Арьс нь хүртэл шир шиг зузаан
Азарганы чадалтай хашаатын аварга
Амласан болгоныг төвөггүй давсаар
Арсланг алгасч аварга болсон
Арвын даваатай ар хангайн аварга
Аархаж хөөрдөггүй санжаа аварга
Өвөр монголд ч түрүүлж л байсан
Өөрийн нутагтаа ч бас л түрүүлдэг
Өөрөөсөө төрмөл тамиртай аварга
Өшөөч түрүүлэх эрэмбэтэй аваргаа
2016 оны 7 сарын 15нд
Б.Улаанхүү, Багануур
( Сэтгэгдэл бичих | Шүлэг
| Оноо: 0/0 | Зохиогч : Бусад )
|
|
Шүлэг: Б.Улаанхүү : Багахэнтийн уяан дээр айрагдах морьд эвшээлгэнэ
Оруулсан admin on 2016-07-16 11:03:30 (4124 уншсан)
Нүүрэнтэйн хөндийн хурднууд хэрлэн өгсөн тарлахад
Нацаг доржийн буйран дээр шувуун саарал үүрсэж
Найман зууны тэртэйгээс хааны шаргууд янцгааж
Намхан монгол морьдын догшин туурай тачигнана
Бага гүний овоон дээр сунгаа явуулан хөлслөхөд
Бага нуурын мандал дээр бадам лянхуа дэлгэрч
Байдсан гүүний унаган дээр тэнгэрийн солонго татаж
Бага хэнтийн уяан дээр айрагдах морьд эвшээлгэнэ
Шилийн сайн эрчүүдийн адуу зөрүүлсэн овоон дээр
Шилмэл хүлгүүд солилцсон багануурын дэнж дээр
Шүүдэр буусан ширгэн дээр түр амарсан тал дээр
Шигшмэл хүлгүүдээ сойсон нүүрэнтэйн талын уяачид
Зургаан насныхаа морьдоор зул задруулан гайхуулж
Зуун түмэн хүлгийг тархилж хөтлүүлэн гангарах
Засал уяа нь тохирсон айргийн тавын морьд бий
Газар газрын хурднуудыг урин дуудаж уралдах
Гал шарын угшлаар хурд сэлбэгдсэн хурднуудтай
Газрын доорхи баялагаар авдар дүүргэсэн нөөцтэй
Гарт атгасан цулбуур нь айраг алдахгүй хүлгүүдтэй
Галуутайн нуурын хөндийд галаа асаасан уяачид
Ган амгаа шаргиулсан нүүрэнтэйн хурдан хүлгүүд
Газар цавчлан тэлүүлэх тэнгэрлэг монгол морьд
Ганзганы ногт буцаагаагүй баганхэнтийн хурднууд
2016 он 7 сарын 14
Сартуул Халх Б.Улаанхүү, Багануур хот
( Сэтгэгдэл бичих | Шүлэг
| Оноо: 0/0 | Зохиогч : Бусад )
|
|
Шүлэг: А.Шихихутуг : 10 жилийн аниргүй
Оруулсан admin on 2016-04-23 00:08:04 (4709 уншсан)
Цаг хугацаатай зогссон зүрх
Цохилж биднийгээ баярлуулаач
Цахилж явсан гал халуун нас
Замхарч тэнгэрт одлоо
Зулайг чинь үнэрлэх эцэгнээс чинь
Зураг л үлдхийн цагтаа
Хөшүүн биеийг тэврээд ч чи бүлээцүүлэхгүй
Зүүн өвдөгнөөс нь адисаан авч
Зүүдлээ ч үгүй амьдралдаа тавтай морил...
Цаг хугацаатай зогссон зүрх
Цохилж биднийгээ баярлуулаач
Цахилж явсан гал халуун нас
Замхарч тэнгэрт одлоо...
Дүрэлзэн шатаах галнаас би харамлаж орилно
Дүнхийн найгах хорвоог би үзэн ядна
Алгын чинээ суварганд
Аав чинь юм шүү гэж надад хэллээ
Үлдсэн нурам нь
Үүрдийн мөнх оршиг гэж
Энгэртээ би нааж
Эцсийн илч нь зүрхэнд минь шингэг гэж би шивнэлээ..... А.Шихихутуг
( Сэтгэгдэл бичих | Шүлэг
| Оноо: 0/0 | Зохиогч : Бусад )
|
|
Шүлэг: Б.Улаанхүү : ХАЗААР ЦУЛБУУР СУЛРААГҮЙ ХҮЛЭГ ЭЭ
Оруулсан admin on 2016-04-02 20:40:16 (4350 уншсан)
Алдарт завханы Донойн хөндийд
Алсыг харан янцгааж байдаг
Алтан дэлхийн бүгээн тоосыг
Аяган туурайгаар босгож байдаг
Адуутай айлын шон дээр сойгдож
Амгаа зуузай шаригуулж байдаг
Алхан толгойт адуун сүргийн
Айраг сэнгэнэсэн зэлний унага
Алдарт Завхан голын хүлэг
Аймаг алгасан уралдаж байдаг
Азтай одтой монгол морь
Алтан туурт ажнай хүлэг мину
Зууд ч байсан зугтаж л уралддаг
Зургаад ч байсан зурхайд ирдэг
Зун гантайд ч зулар ч л уралддаг
Зудтай өвлөөр ч тархинд тавалдаг
Хахир хавраар ч хашигнаж уралдаагүй
Хазгай газар ч хальт гишгээгүй
Хангай говийн хаана ч ялгаагүй
Хазаар цулбуур сулраагүй хүлэг ээ
2016 он 4сарын1сартуул Б.Улаанхүү Багануур
( Сэтгэгдэл бичих | Шүлэг
| Оноо: 0/0 | Зохиогч : Бусад )
|
|
Шүлэг: Б.Улаанхүү : БИ АЗТАЙ ОДТОЙ МОНГОЛ ХҮН
Оруулсан admin on 2016-04-02 20:36:04 (5388 уншсан)
Би ам дүүрэн ерөөлтэй
Аяга дүүрэн айрагтай
Атга дүүрэн шагаатай
Адуу гэж хөлд орсон
Ар газрын монгол хүү
Би Агтны тоосонд булуулж
Аргамагийн сайныг унаж
Айрагны амтанд халамцсан
Адуутай нутгийн эр хүн
Азтай одтой монгол хүн
Би Алаг манан хөөрөг зөрүүлж
Амар мэндээ мэдэлцэж сурсан
Арван ханатай монгол гэртээ
Аянчин гийчин тосч үдсэн
Амны бэлэгтэй монгол хүн
Би айраг эссэн хөхүүрнээс
Арз хорзын нэрмэл нэрж
Авдар дээрх бурхан сахиусандаа
Амсах тахил өргөн хүндлэж
Ассан галандаа дээж өргөсөн
Адууны тоостой монгол айлаа
Би хөдөө нутгийн зөөлөн хөрсөнд
Хөл нүцгэн хурдлаж өссөн
Хөх монголын тамгатай хүүхэд
Хөлслөх морьдын унаач хүүхэд
Хөөмийлж тоголсон монгол хүүхэд
Хүчирхэг түүхтэй Чингисийн удам
2016 оны 3 сарын 22 сартуул Б, Улаанхүү Багануур
( Сэтгэгдэл бичих | Шүлэг
| Оноо: 0/0 | Зохиогч : Шүлэг )
|
|
Шүлэг: Б.Улаанхүү : ЗАВХАН ГОЛЫН УНАГАНУУД ЗАРД ГАРСАН ХҮЛЭГҮҮД
Оруулсан admin on 2016-04-02 20:32:38 (5007 уншсан)
Завхан голын унаганууд залгах удамтай хүлэгнүүд
Замилан хорвоод дуурсах угшил сайтай унаганууд
Залгаа зургаан хүзүүндээ үегүй төрдөг удамтай
Зандан ширээ шиг зоон доо айргаар мялаах хувьтай
Зөөлөн матмал хавирган даа илүү тоотой төрдөг
Зүрхэн талын сугандаа гуурстай төрдөг удамтай
Зулай цагаан Отгоны авшиг авсан азаргануудтай
Зөндөө олон шинжүүд бүрдмэл төрдөг буянтай
Завхан голоор овоглож зард гарсан хурднуудтай
Зурхайд түрүүлж гишгэх удмын хурдан шандастай
Зуун зуунд дуурсах угшил сайтай удмуудтай
Зурж зорсон юм шиг төгс шинжийн нь бүрдмэл
Зүс зүсээрээ нь нийлсэн халиун саарлын ижилтэй
Зүтгэл итгэл алдадгүй хурдан туурайт олонтой
Зүүн бүсийн уралдаанд айрагдаж түрүүлж үзсэн
Зүр гурын шинжтэй завхан голын алдарт хүлэгүүд
Завханы сартуул халхуудын омогшил болсон адуутай
Завхан голынхоо урсгал шиг халигж цалилгсан хурдтай
Завсар гаргаж өнждөггүй залгаа хурднууд арвинтай
Заан цагаан соёотой ангайж эвшээсэн азаргатай
Зөнтэй юм шиг угаасаа түрүү айргаа мэдэрдэг
Зөөлөн шаргал тоосыг тэнгэрт тултал босгосоор
Зурхайн цагаан хэцэн дээр эрчээрэй ирдэг хүлэгүүд
Даншиг наадмын түрүү халиун зүстэй хүлэгтэй
Дахин батлан түрүүлж даян түмэн эх болсон
Эцэг өвгөдийн минь удамт энэ сайхан хүлэгүүд
Элэрч баларч дуусашгүй Завхан нутгийн буян юм
2016 оны 3сарын 23 сартуул Б.Улаанхүү Багануур
( Сэтгэгдэл бичих | Шүлэг
| Оноо: 0/0 | Зохиогч : Шүлэг )
|
|
Мэдээ: Энэ чинь хэн нэгэн биш Пүрэв баавай шүү дээ
Оруулсан admin on 2016-03-29 16:23:42 (6371 уншсан)
Монгол улсын Соёлын гавьяат зүтгэлтэн Д.Нацагдоржийн нэрэмжит шагналт зохиолч С.Пүрэв баавайд маань уншигч түмний маань тус дэм одоо л хэрэгтэй байна. Нүүрномын ертөнцөд цонхоо нээгээд өдөр бүр залуус бидэндээ ухаан, урынхаа шаглааг өглөөний нартай уралдан хүргэдэг түүнтэй нүүрномын найз больё гэвэл Пүрэв Санж нэрээр хүсэлт илгээгээрэй. Манай цахим залуус хүчтэй шүү дээ. Дунд маань ухаанаа уудлан суугаа утга зохиолын нэгэн суутнаа өргөөд л босгоно доо. Та нар минь ядаж л зурган дээр байгаа утсаар холбогдоод саяхан хэвлэлтээс гарсан шинэ номнуудыг нь худалдан аваарай.
Дансны дугаар:
ХААН банкны данс 503 4402 911. Санжийн ПҮРЭВ.
ТӨРИЙН БАНК 103 200 150 992 Санжийн ПҮРЭВ
Хэрвээ СУВАРГАН ЦЭНХЭР УУЛС киноны гол дүрийн жүжигчин Батцэцэг эгчид тусламж хэрэгтэй байсан бол ард түмэн хуйгаараа босно доо. Гэтэл энд зохиолч нь даруухаан шинэ өглөөний сайхныг тэмдэглэж суух хэрнээ цаана нь үхэлтэй нүүр тулж сууна. Туслаарай монголчууд аа.
(Дэлгэрэнгүй... | Сэтгэгдэл бичих | Мэдээ
| Оноо: 0/0 | Зохиогч : Мэдээ, мэдээлэл )
|
|
Бусад: Д.Сосор : Миний муу эжий
Оруулсан admin on 2016-03-20 17:20:54 (7051 уншсан)
Миний дөчөөд жилийн хөдөлмөр. Олон жил хэвлүүлэх гэж зүтгэсэн. Энэхүү номоо уншигч таны гар дээр тавьж байгаадаа урамтай байна. Энэ номд “Итгэл”, “Давхар хаалга”, “Миний муу эжий”, Чийжаа” зэрэг туужууд, социализмын үед бичиж байсан өгүүллэгүүд бас шог хошин зохиолууд орсон байгаа. Социализмын үед бичиж байсан зохиолууд маань огт шинээрээ байгаа нь энэ ном цагийн аясыг даах нээ. Уран зохиолыг уншигч та, цаг хугацаа хоёр шүүдэг болохоос улс төр, Төр засаг, зохиолчдын хороо, алдар цол шүүхгүй. Александр Дюма, Лев Толстой, Жек Лондон нар ардын уран зохиолч, гавьяат зүтгэлтэн, хөдөлмөрийн баатар байгаагүй гэдгийг санатугай.
Миний муу эжий
(номноос)
...........Эцэгтэй минь нийлээд овоо хэдэн жилийг элээсэн юм билээ. Үр хүүхэд тогтодгүй хэцүүхэн айл аа. Есөн хүү төрүүлснээс гурав нь амьд сэрүүн, бусад нь өсөх насандаа л ээжийн минь голыг харлуулсан байдаг юм. Үр хүүхэд тогтохгүй болохоор “Юм мэддэг” хүнд үзүүлэхэд, гурван чулуу тарнидаж өгөөд:
-Одоо гарах хүүхдээ айлд өргүүлчих. Энэ гурван чулууг хадгалж яв! Хаяж, үрэгдүүлж болохгүй гэжээ. Гэдсэнд байсан хүүхэд нь нөгөөх баян айлд эргүүлээд өргүүлсэн миний дээд ах. Үрээ харамлах сэтгэл нь хэчнээн чанааж байсан ч юм мэддэг хүний үгийг яахан зөрчих билээ.
(Дэлгэрэнгүй... | Сэтгэгдэл бичих | Бусад
| Оноо: 0/0 | Зохиогч : Мэдээ, мэдээлэл )
|
|
Бусад: Д.Сосор : Бүргэд хаалга
Оруулсан admin on 2016-03-20 17:16:15 (6118 уншсан)
Авлигал, хээл хахуул, хүний наймаа, гадаадын хөрөнгө оруулалтын тухай роман. Дунд гарын авлигачид жирийн бидний амьдралд яаж нөлөөлдөг, авлига авах арга барилууд, энэ үзэгдлээс болж Хятадад худалдагдсан нэгэн ядарсан Монгол бүсгүй, хөдөөгийн малчин залуу хоёрын тухай гарна. Тэдний амьдрал, хувь заяагаар авлигачид яаж тоглосныг уншиж үзээрэй.
Бүргэд хаалга
(Романаас)
............ Тэр залуу хоёр зуун ширхэг хаалга оруулж иржээ. Нэгд нэггүй тоолоод үзэхэд яг л хоёр зуу. Гаалийн мэдүүлэгтээ мөн л хоёр зуу. Өө эрээд олохгүй энэ барааг Жаргалаас өөр хүн бол шууд л оруулчихна. Тэр их гярхай хүн болохоор хайрцгийг нь бага зэрэг зузаан байхыг анзаарч:
- Энэ хайрцгийг задал даа гэхэд залуу сандарч, тэвдэлгүй шууд л нэг талынх нь булаг хутгаар хайр найргүй яран үзүүлэв. Нэг хаалга болох нь харваас илт.
- Бүр цааш нь. Дуустал! гэж Жаргалыг хэлэхэд залуу хурдан хөдөлгөөнөөр доод талыг нь гүйцээн задлав.
Үнэхээр нэг хаалга. Гэвч Жаргал юмыг дуустал үзэж байн санаа нь амардаг хүн болохоор дээд талыг нь задлуулж үзвэл мөн л нэг хаалга. Түүний санаа амралгүй:
- Наад хаалгаа харцаганаас нь бүр гарга гэлээ.
Үүн дээр л залуугийн царай хувьс хийж:
(Дэлгэрэнгүй... | Сэтгэгдэл бичих | Бусад
| Оноо: 0/0 | Зохиогч : Мэдээ, мэдээлэл )
|
|
Мэдээ: Д.Сосор : Хар харцагын ЛОДЖЕ КАЗИНО
Оруулсан admin on 2016-03-20 17:07:37 (5604 уншсан)
Америкт ажиллаж, сурч, амьдарч байгаа Монголчуудын тухай, эгэл жирийн Америкчуудын амьдралын хэвшил, зан характер (авир), хүн чанарын тухай, мөн бусад орны цагаачид бүр тодруулж хэлбэл Латинамерикчууд буюу “Халтар царайт”-уудын тухай, хөгжилтэй бөгөөд инээдэмтэй адал явдлуудаар сэдэвлэн бичсэн роман. Гадаадад аялж жуулчлах, ажиллаж амьдрах, сурч боловсрох хүсэлтэй залуу хүн бүр энэ номыг уншиж үзэхийг зөвлөж байна.
НОМЫН ДЭЛГЭРЭНГҮЙ
Хар харцагын Лодже казино
(романаас)
Тэнд одод цөөхөн байдаг юм бүлгээс
..............Би эртлэн босож, үс сахлаа янзлан, үнэртэн танартан түрхэж, цайныхаа ганц костюмаар өөрийгөө өөд нь татаад АНУ-ын ЭСЯ дээр ирлээ. Тэнд хориод хүн ирчихсэн есөн цаг болохыг хүлээнэ. Би тэдэнтэй мэндлээд сүүлчийн хүнийг асуувал дунд зэргийн нуруутай, гуч орчим насны залуу:
-Би л болж байх шиг байна. Та хүнд дугаар авах гэж яваа юм уу? гэж асуув.
Би “За, тэр шүү! Ер нь бүтэхгүй юм байна. Энэ залуу намайг суралцах виз хүсэх бүү хэл, визний ярилцлагад орох хүн гэж үзэхгүй байхад тэр консулын ажилтан надад яаж итгэх билээ” гэж бодсоноо, чухам юу гэж хариулахаа мэдэхгүй:
(Дэлгэрэнгүй... | Сэтгэгдэл бичих | Мэдээ
| Оноо: 0/0 | Зохиогч : Бусад )
|
|
Шүлэг: Ц.Хулан ： Аавдаа
Оруулсан admin on 2016-03-18 03:54:00 (43369 уншсан)
Сайхан залуу аавынхаа тэргүүнд буурал орсныг анх үзээд
Саваагүй томоогүй хүүхэд насаан би тэр жилийнх нь шувуудтай хамт буцаасан
Санчиганд нь нэмэх мөнгөн сорны тоолон жаргаана даа тэгвэл гэхэд
Санаснаар даанч болохгүй явна ааваа
Бүүвэйт хонгор эжийн тухай дуу мэдээж олон
Бүдэгхэн гардаг зураг шиг санаатай хийдэг алдаа шиг
Бүхий л орчлонд харин аавын ач гэж дуулдаггүй
Бүгдийнх нь аав ямар миний аав шиг биш дээ
(Дэлгэрэнгүй... | Сэтгэгдэл бичих | Шүлэг
| Оноо: 84/17 | Зохиогч : Хулан Ц )
|
|
Шүлэг: Бодол
Оруулсан admin on 2016-03-15 11:02:17 (5519 уншсан)
Гэв гэнэтхэн чиний л тухай бодчихоод
Гэмшиж суухдаа ч хүртэл догдлоод л
Саваагүй хүслээсээ харин ч би айхгүй байна аа
Санаад л байх аваас хүрээд ирэх юм шиг
Зуун шүлэг биччихвэл уужирчих юм шиг
Зуун удаа зөвхөн чамд дуралчихсан юм шиг
Гартаа барьсан номоо гаднаас нь уншиж
Ганцхан удаа би нөгөө ертөнцөд амьдарсаан
Хамаагүй ээ хүрээд ирэхгүй байсан ч
Хайрлан дурласан сэтгэлийн хүлээс алдууртал
Хүлээж хүлээж дараа нь
Хүйтэн гараа даллах гэж
Хүсээд ч байгаа юм ууу чиний тухай бодном
( Сэтгэгдэл бичих | Шүлэг
| Оноо: 0/0 | Зохиогч : Бусад )
|
|
Шүлэг: Ш. Дулмаа : Газар шороондоо би хайртай
Оруулсан admin on 2016-03-14 21:46:53 (12973 уншсан)
Хөлд орохдоо унаж босон мөрөө гаргаж
Хүйтэн булгийн уснаас нь шүдээ тагштал залгилж
Талын тогоруу нуурын ангир үргээж
Таанын толгой цэцгийн дэлбээ түүж явсан болохоор
Газар шороондоо би хайртай
Толгодын энгэрээр хургаа хариулж явахдаа
Тоодон дээлэндээ чулуу хормойлж гэр барин
Хөрст газрыг нь хотойтол хөл нүцгэн гүйж
Хөнгөн залуу насаа талд үдсэн болохоор
Газар шороондоо би хайртай
Ээжийн минь амгалан үедээ өрхийг нь татаж
Энгэр бэл дээр цэмцийн харагддаг байсан
Төрсөн гэрийн минь буйр мөөгөн хүрээ татаж
Төө зайгүй амьдралын илч шингээж байдагт нь
Газар шороондоо би хайртай
Аймгийн сургуульд орчихоод гэрээ санан ганихарч
Ар багийн хотлоор гэрийн бараа ширтэж
Асгарах нулимстай нүдэнд зурайн харагддаг байсан
Алтан шаргал замыг одоо болтол санадагтаа
Газар шороондоо би хайртай
Уулс толгодын дээгүүр үүлс суунаглан нүүж
Унасан морьны туурай газар хотойтол цавчилж
Учрахын сайхан ерөөлөөр хос зүрхэн цохилж
Уудам талын бэлчээрт хайр амталсан болохоор
Газар шороондоо би хайртай
Харийн дайсан халдахад гал голомтоо хамгаалж
Халхын сайхан эрчүүд буу мөрлөж мордохдоо
Хатан туулын усыг рашаан гэж амтлан
Хайрга чулуу шороог нь алчууртаа боож явсанд нь
Газар шороондоо би хайртай
Арван төө биенийхээ алжааж ядрахыг мэдэлгүй
Ариун талын уудамд цуурай хадтал дуулж
Аагтай залуу насныхаа ид бахыг үзэх гэж
Атрын онгон хөрсөнд үр суулгалцсан болохоор
Газар шороондоо би хайртай
Зуур хоносон сарны тэргэл туяаг орлох гэж
Зуун түмэн зулыг эх газартаа асааж
Тэнхээт биенийхээ хөлсийг дусал дуслаар шингээх гэж
Тэнгэрлэг эх орондоо эзэн нь болж төрсөндөө
Газар шороондоо би хайртай
( Сэтгэгдэл бичих | Шүлэг
| Оноо: 0/0 | Зохиогч : Бусад )
|
|
Шүлэг: Ш.Гүрбазар : Ижий танаа
Оруулсан admin on 2016-03-08 00:26:18 (5705 уншсан)
Ээжээ та хүүдээ гомдодгүй биз дээ
Хүү чинь уул өргөж таныхаа ачийг хариулах
Урт холын бодлын тэнд дараатай л яваа шүү дээ
Ээжээ үүрээс нойрыг чинь харамлахдаа өрхөндөө түрүүлж
Үдшийн галаас хацрыг чинь өмөөрөхдөө тулгандаа урьтаж
Гадаа гэртийн хооронд
Гарын хариу баривал болж л байна л даа ээжээ
Гэлээ ч ижий минь та
Гарынхаа дэргэд гар
Нүднийхээ дэргэд нүд байлгах гэж
Намайг төрүүлээгүй болохоор
Ухаанаасаа ухаан төрүүлсэн болохоор
Урт холын бодол минь
Тулганы захаас хол байдаг юм шүү ээжээ
Ээжээ та хүүдээ гомдоогүй биз
Хүү чинь уул өргөж таныгаа ачийг хариулах
Урт холын бодлын тэнд дараатай яваа шүү
Нэг л өдөр зай чинь ханхайж
Нэгний өглөө хацар эзгүйрнэ гэж
Бодож чаддаггүйдээ
Үрийнхээ нүдэнд их өтөлж
Үлгэсэн мээмээ ширгэсэн гэж бодож чаддаггүйдээ
Буянтай таныхаа ачийг би
Буцах гийчний бэлгийн хариу шиг яараагүйдээ алдаж мэдэх юм aa
Гэлээ ч миний намхан ижий та
Хүүдээ битгий гомдоорой
Хүү чинь уул өргөж таныхаа ачийг хариулах
Урт холын бодлын тэнд дараатай яваа шүү
Ээжээ та хүүдээ гомдоогүй биз дээ
Хайртай ээж таныгаа би мөнхийн мөнхөд хайрлая
Будан суухаас нь өмнө тэнгэрээ аргадая
Буурал нөмөрхөөс нь өмнө ижийгээ хайрлая aa
Мөчөө тэнцүүлж өндийн хөлд орохын цагт
Мөөмөнд нь байсан сүү сэтгэлд нь шингэдэг ижий минь
Мөрөө цувуулж тамгалан хүн болохын цагт
Сэтгэлд нь багтаагүй сүү санчиганд нь гэрэлтдэг ижий минь ээ
Би боддог юм, зүүн уулын солонго нь баруунаа татсан ч яахав
Зүүдлээд сэрхэд, ижий минь дэргэд минь л байвал жаргалтай гэж
Би хүсдэг юм өдөр өдрийн аашинд нь уйлж дуулах минь ч яахав
Өмөлзсөн хушуугаа би ижийдээ үнсүүлжил байвал жаргалтай гэж
Би мөрөөддөг юм дутуутай хатуутай хорвоод нь
Бүтэн жаргаагүй ч яахавдээ
Дууны мөнхийн эхлэл шиг миний ижий
Дэргэд минь л байвал жаргалтай гэж би залбирдаг юм
Үүдэн гурван сараас нь нэг нь дутсан ч яахав дээ
Үлгэрийн төгсгөл шиг миний ижий
Үрдээ харагдаж байвал жаргалтай гэж
Би ижийнхээ тухай дуулж, ижийнхээ тухай шүлгэлж
Тэнгэр мэт бурхан мэт ижий таньдаа
Дуун өргөлөө өргөж байна ижий минь ээ.
( Сэтгэгдэл бичих | Шүлэг
| Оноо: 0/0 | Зохиогч : Гүрбазар Ш )
|
|
Шүлэг: Н.Тайванжаргал : Эх
Оруулсан admin on 2016-03-01 19:52:30 (4542 уншсан)
“Эх”
Эх хүн гэж
Миний ээжийг хэлдэг
Ээжээ гэж дуудах
Энхрий үр нь би байдаг
Эх хүн бурхан биш ч
Элбэрэл хайр нь ид шид байдаг
Эмч домч биш ч
Эдгээх анагаах нь дом байдаг
Эх хүний
Сүү сэтгэл хоёр нь цагаан байдаг
Сүсэг бишрэл нь гэгээн байдаг
Сүүдэр газар ч нартай байдаг
Сөгдөж суугаад залбирмаар байдаг
Эх хүний
Дуун аялгуу нь бүүвэй байдаг
Дундаа тасардаггүй аялгуу байдаг
Дуулж суугаа нь элбэрэл байдаг
Дууны дахилт нь сүү байдаг
Эх хүний
Өнө мөнх хайр нь гэгээн байдаг
Өгөөмөр сэтгэл нь цагаан байдаг
Өглөө нар шиг ялгуун байдаг
Үргэлж санахад сайхан байдаг
Эх хүний
Төрүүлж өсгөсөн заяа нь эгэлгүй байдаг
Түшиж өндийхөд эх хүний хайр дэм байдаг
Түгдчиж алхахад урмын үг нь тэнцвэр болдог
Түгшиж айхад нөмөр нь ивээл байдаг
Эх хүний
Унаж бүдрэхэд сэтгэл нь газар зөөллөдөг
Уйлсаар очиход нулмис сэврээх шидтэй байдаг
Урмын үг нь бурам шиг байдаг
Ухаан тэгширүүлсэн үг нь сургаал байдаг
Эх хүний
Ухаан сүү хоёр нь ундарч байдаг
Урсгал их мөрөн шиг дэвэрч байдаг
Урам шагнал хоёр нь дүүрэн байдаг
Уяхан сэтгэл нь хайр байдаг
Эх хүний
Хайр ухаан хоёр нь хамт байдаг
Халамж энэрэл хоёр нь нар байдаг
Халуун сэтгэл нь хайр байдаг
Хамтдаа байхад бурхан шиг байдаг
Эх хүний
Хариу нэхээгүй сэтгэл нь сүү байдаг
Халамж хайр нь амь байдаг
Харж суухад бурхан байдаг
Хайрлаж санахад шүтмээр байдаг
Эх хүний
Үгийн үзүүрт нь сургаал байдаг
Өгүүлбэрийн төгсгөл нь ухаан байдаг
Үнсэлт бүхэн нь бурам байдаг
Үнэний төлөөх сэтгэл байдаг
Эх хүний
Тэнгэр их заяа нь эгэлгүй байдаг
Тэвчээр хатуужил нь гайхмаар байдаг
Тэнцүү биш эр эмийн тавиланд
Тээж төрүүлэх их хувьтай байдаг
Эх хүний
Буртаггүй сэтгэл нь
Булайг нимгэлсэн сүү байдаг
Бусдын төлөө шаналах нь
Буяны мөр байдаг
Эх хүн
Элбэрэл буяны даллага байдаг
Эцэг хүний хайр нь байдаг
Эндэх алдах нь үгүй байдаг
Ирээдүй цагийн эхлэл байдаг
Эх хүн
Бараан нөмөрлөсөн ч гэгээн дүртэй байдаг
Бачимдаж орилсон ч тайвшруулах үгтэй байдаг
Баяр хөөрийн дээд нь байдаг
Байнгà бодогдох бурхан минь байдаг
Эх хүн
Алдаа оноог ялгагч нь байдаг
Арга ухааны дээд нь байдаг
Аз жаргалын замыг заагч нь байдаг
Алив бүхний эхлэл нь байдаг
Эх хүн
Энэ амьдралын эхлэл байдаг
Энэрэл хайрын ундарга байдаг
Эхлэл төгсгөлгүй үргэлжлэл байдаг
Эрхэм чанарын эх булаг нь байдаг
Эх хүн
Үүрд ханийн түшиг байдаг
Үргэлж гэгээн саруул байдаг
Үдийн нарны илч шиг өгөөмөр байдаг
Үнэнч хайр нь дулаан байдаг
Эх хүн
Үхэл амьдралын зааг дээр
Үргэлж аврагч байдаг
Үрдээ биеэ хуваасан ачий нь
Үнэлж цэгнэх аргагүй байдаг
Эх хүн
Гаслан хяслант хорвоог гэтэлгэгч байдаг
Гайхамшигт ачлал нь элбэрэл байдаг
Гамшиг аюулыг туулах арга ухаан байдаг
Гал халуун сэтгэлийн булаг байдаг
Эх хүн
Элэгдэж эмтэрсэн ч
Эцсийн ганц амьсгал нь үрдээ л байдаг
Ээдрээт амьдралын эсрэг
Ирлэж хурцалсан сэтгэл байдаг
Эх хүн
Хол ойрын газрыг сэтгэлдээ багтаасан
Хорвоогийн амьдралын эхлэл байдаг
Хосоор амьдрах тавилангийн
Хоёр амины нэг нь байдаг
Эх хүн
Бурхан биш ч
Бүхний эхлэл амьдрал байдаг
Буян хийсэн тус нь
Бузрыг арилгасан ухаан байдаг
Эх хүн
Газар дээрхи
Ганц гэрэл гэгээ нь байдаг
Гарцаагүй үнэнийг олж хэлдэг
Гайхамшигт үгний эзэн нь байдаг
Эх хүн
Энэрэнгүй сэтгэлийн дээд байдаг
Эгэлгүй нэгэн хосгүй заяа байдаг
Эхлэлээсээ аваад төгсгөл хүртэл
Эх авсан ундрага шиг байдаг
Эх хүн гэж
Энэ биеийн үндэс байдаг
Ирж буцах хорвоогийн
Ирээдүй цагийн гүүр нь байдаг
( Сэтгэгдэл бичих | Шүлэг
| Оноо: 0/0 | Зохиогч : Тайванжаргал Н )
|
|
|
|
 |
Санал асуулга |
 |
|
Та манай гишүүн болохыг хүсвэл энд дарна уу.
t
Одоо онлайнд 102 зочин 0 гишүүн байна.
|
|
|
 |
 |
Агуулга |
 |
|
|
Та сараа сонгоно уу
 |
|
|
|
 |
|
Facebook 
Twitter 
